वर्धा : शाळांमध्ये विद्यार्थिनींवर होत असलेले अत्याचाराचे काही प्रकार पुढे येतात तर काही दबल्या जातात. हे सर्वच प्रकार पुढे यावे यासाठी पोलिस महासंचालकांच्या विचारातून "पोलिस दीदी, पोलिस काका' हा उपक्रम राबविण्यात येत आहे. "कम्युनिटी पोलिसिंग'अंतर्गत हा उपक्रम राबविण्यात येत असल्याचे सांगण्यात आले आहे. 
वर्ध्यात शनिवारी (ता. 25) या उपक्रमाचे पोलिस अधीक्षकांच्या हस्ते उद्‌घाटन करण्यात आले. 

या उपक्रमाअंतर्गत ज्या पोलिस कर्मचाऱ्यांची यासाठी नियुक्‍ती करण्यात आली ते कर्मचारी आठवड्यातून ठरलेल्या दिवशी त्या शाळेला भेट देणार आहेत. भेटीदरम्यान पोलिस दीदी, पोलिस काका शाळेतील विद्यार्थ्यांशी चर्चा करून त्यांच्या अडचणी जाणून घेणार आहेत. शिवाय शाळेत असलेल्या क्रमांकावरही संपर्क साधण्याच्या सूचना करण्यात आल्या आहेत. शाळेतून एखाद्या विद्यार्थ्याची तक्रार आल्यास त्यावर तत्काळ कारवाई करण्याच्या सूचना करण्यात आल्या आहेत. या उपक्रमाअंतर्गत एका पोलिस कर्मचाऱ्याकडे तीन शाळा देण्यात आल्या आहेत. 

जाणून घ्या - ...अन्‌ साखरपुड्याच्या दिवशीच निघाली अंतयात्रा

उद्‌घाटन कार्यक्रमाला जिल्ह्यातील अनेक शाळा व महाविद्यालयातील विद्यार्थी, विद्यार्थिनी आणि त्यांचे शिक्षक उपस्थित होते. विद्यार्थ्यांना या उपक्रमाबद्दल माहिती देण्यात आली असून, त्यांच्याकडून यावर अंमलबजावणी करण्याचे आवाहनही पोलिस विभागाकडून करण्यात आले आहेत. या उपक्रमावर येत्या एक फेब्रुवारीपासून अंमलबजावणी करण्यात येणार असली तरी अडचणीत असलेल्या विद्यार्थ्यांनी आताही तक्रार केल्यास मदत मिळणार असल्याची माहिती पोलिस विभागाकडून देण्यात आली आहे. उद्‌घाटन कार्यक्रमाला जिल्ह्यातील विविध शाळेतील विद्यार्थी व शिक्षकांसह चारही विभागाचे उपविभागीय पोलिस अधिकारी उपस्थित होते. 

शाळांना पाठविले पत्र

उपक्रमाची माहिती देण्यासाठी पोलिस विभागाकडून जिल्ह्य्रातील सर्वच शाळांना पत्र पाठविण्यात आले आहे. या पत्रानुसार त्या ठाण्याअंतर्गत कर्मचाऱ्याची नियुक्‍ती शाळेत करण्यात आली आहे.