यवतमाळ : आपल्या मुलीने डॉक्टर व्हावे, असे स्वप्न तिच्या वडिलांनी बघितले. दहावीत चांगले गुण मिळवायचे, म्हणून सानिका अभ्यासात मग्न असायची. तर, सततची नापिकी व कर्ज कसे फेडायचे, ही विवंचना सुधाकर पवार यांना स्वस्थ बसू देत नव्हती. सहा मार्चला त्यांनी विहिरीत उडी घेऊन जीवनयात्रा संपविली.
संस्कृत विषयाचा अभ्यास करीत असतानाच दु:खद वार्ता तिला कळली. या काळात मराठी कवितांनी तिला आधार दिला. तिच्या डोळ्यापुढे एकाएकी अशोक थोरात यांची कविता आली. एकएक ओळ ती आठवत अश्रूंना रोखू लागली. “वेदना झाल्या तरीही अश्रू गाळणार नाही”, असा मनोमन निश्चय तिने केला.
संस्कृतचा पेपर द्यायला परीक्षा केंद्रावर गेली. वडिलांचा चेहरा आठवत जड अंतकरणाने पेपर दिला. बुधवारी (ता.29) दुपारी निकाल आला. ग्रामीण भागात सुविधांचा अभाव असताना गुणी लेकीने दहावीत 97. 60 टक्के गुण मिळविले. विशेष म्हणजे संस्कृत विषयात शंभर पैकी शंभर गुण मिळाले आहे.
सानिका सुधाकर पवार असे गुणवंत विद्यार्थिनीचे नाव असून, यवतमाळ तालुक्यातील हिवरी येथील रहिवासी आहे. वडार समाज तसाही शिक्षणापासून दूरच. त्यात कौतुकाची थाप मारण्यासाठी बाबा नाही, याचे शल्य तिला सारखे बोचते आहे. शिक्षण घेऊन तिला डॉक्टर व्हायचे आहे आणि प्रशासकीय सेवेत जाऊन शेतकर्यांसाठी ठोस उपाययोजना करावयाच्या आहेत. सानिकाला थेट मुंबई येथील विधानभवनातून फोन आला. फोन करणाऱ्या व्यक्तीचे नाव ऐकून तिला धक्काच बसला.
विधानसभा अध्यक्ष नाना पटोले यांनी शेतकर्यांच्या प्रश्नावरच आपल्या खासदारकीचा राजीनामा दिला होता. तेव्हापासून जिल्ह्यातील शेतकरी, त्यांच्या समस्यांची विशेष नाळ जुळली आहे. आत्महत्याग्रस्त शेतकरी कुटुंबातील मुलीला मिळालेल्या यशाची माहिती मिळताच त्यांनी थेट विधानभवनातून फोन केला. “हैलो सानिका, अभिनंदन बेटा, दहावीत किती टक्के गुण मिळाले. कौटुंबिक परिस्थितीबाबत विचारणा करीत मी यवतमाळ जिल्ह्यात येताच हिवरी येथील घरी येऊन भेट घेणार. पुढील शिक्षणाच्या वाटचालीसाठी मदत करण्याचे आश्वासन दिले. कुटुंबाचा आधारवड नसताना स्वत: फोन करून मदतीच्या आश्वासनामुळे सानिकाला पुन्हा लढण्याचे बळ मिळाले आहे.
संपादन - अथर्व महांकाळ
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.