सेवाग्राम (जि. वर्धा) : महात्मा गांधी यांची कर्मभूमी असलेल्या सेवाग्राम आश्रम प्रतिष्ठानचे अध्यक्ष टी. एन. आर. प्रभू यांनी गांधी विचारांना हरताळ फासत कारभार चालविल्याने त्यांना पायउतार करण्यात आल्याची माहिती सर्व सेवा संघाचे अध्यक्ष महादेव विद्रोही यांनी दिली. हा निर्णय 18 मार्च रोजीच घेण्यात आला असला तरी त्याविषयी आता उघड झाले. याविषयी श्री. प्रभू यांचे मत जाणण्याचा प्रयत्न केले असता त्यांच्याशी संपर्क होऊ शकला नाही. 

महात्मा गांधी यांच्या विचारांवर आधारित विधायक कार्य करण्याकरिता सेवाग्राम आश्रम प्रतिष्ठानची स्थापना करण्यात आली. या आश्रमाच्या अध्यक्षांची निवड सर्व सेवा संघ करीत असते. 2018 मध्ये केरळ येथील टी. एन. आर. प्रभू यांची अध्यक्षपदी निवड करण्यात आली. तेव्हापासून आश्रमाचा कारभार प्रभू सांभाळत होते. या दरम्यान गांधी विचारांना अभिप्रेत असलेली कामे न करता ते स्वतःच निर्णय घेत होते, सर्व सेवा संघाला विश्‍वासात घेत नव्हते, असा आरोप त्यांच्यावर होता. याबाबत त्यांना अनेकदा समजविण्यात आले; मात्र दाद न दिल्याने त्यांना पायउतार करण्यात आले. 18 मार्चला पायउतार केल्यानंतर त्यांनी 27 मार्चला गावी केरळला जाण्याकरिता तिकीट काढले होते. मात्र लॉकडाउन घोषित झाल्याने ते येथेच राहिले, असे महादेव विद्रोही यांनी सांगितले. 

अध्यक्ष श्री. प्रभू यांना पायउतार केल्यानंतर अध्यक्षपदाचा तात्पुरता पदभार प्रतिष्ठानचे मंत्री मुकुंद मस्के यांना देण्यात आला. दरम्यान, दोन दिवसांपूर्वी श्री. प्रभू यांनी अध्यक्षपदाच्या राजीनाम्याचे पत्र संचालक मंडळाला पाठविले. यानंतर शनिवारी (ता. 23) मुकुंद मस्के यांच्याकडे अध्यक्षपदाचा रीतसर कारभार सोपविण्यात आला. त्यामुळे हा घटनाक्रम उजेडात आला. 

- जंगलात झोपून काढावे लागताहेत दिवस... ऐका नागपुरातील पोलिसाची व्यथा

टी. एन. आर. प्रभू हे आश्रमाच्या नियमांना अनुसरून कामे करीत नव्हते. त्यांनी महात्मा गांधींच्या विचारांना बाजूला सारून अनेक कामे केली. त्यामुळे त्यांना अध्यक्षपदावरून पायउतार करण्यात आले. 
- महादेव विद्रोही 
अध्यक्ष, सर्व सेवा संघ 

अध्यक्षांनी संचालक मंडळाकडे राजीनामा दिला आहे. लॉकडाउनमुळे बैठक होऊ शकली नाही. लॉकडाउन उघडल्यावर यावर बैठक बोलावून निर्णय घेतला जाईल. कदाचित राजीनामा परतही केला जाईल. आश्रमात मतभेद आहे; पण मनभेद नाही. 
- मुकुंद मस्के, मंत्री, आश्रम प्रतिष्ठान, सेवाग्राम