नंदोरी जि. वर्धा : पंतप्रधान नरेंद्र मोदी यांचा ‘परीक्षा पे चर्चा’ हा कार्यक्रम जानेवारीत नवी दिल्लीतील तालकटोरा स्टेडियममध्ये होणार आहे. यात इयत्ता नववी ते बारावीचे विद्यार्थी, पालक, शिक्षक यांच्याशी ते संवाद साधणार आहेत. या कार्यक्रमासाठी विद्यार्थी काही प्रश्न तयार करतील. राष्ट्रीय शैक्षणिक संशोधन व प्रशिक्षण परिषदेमार्फत (एनसीईआरटी) निवड केलेले काही प्रश्न कार्यक्रमात प्रत्यक्ष घेतले जाऊ शकतात. ऑनलाइन सृजनात्मक निबंध लेखन स्पर्धा घेण्यात येणार असून यात सहभागी होण्यासाठी डिसेंबरअखेर नोंदणी करता येणार आहे. २०१८ पासून ‘परीक्षा पे चर्चा’ कार्यक्रमाचे आयोजन केले जाते. यंदा ‘परीक्षा पे चर्चा’ २०२३ स्पर्धेतील विजेत्यांना पंतप्रधानांसोबत कार्यक्रमात सहभागी होण्याची संधी मिळणार आहे. याशिवाय विद्यार्थ्याला प्रमाणपत्र आणि परीक्षेचे किटही देण्यात येणार आहे.

निबंध स्पर्धेसाठी विषय

विद्यार्थ्यांसाठी आमचे स्वातंत्र्य सैनिक, आमची संस्कृती व आमचा अभिमान, माझे प्रेरणादायी पुस्तक, पुढील पिढीसाठी पर्यावरण संरक्षण, माझे जीवन, माझे आरोग्य, माझे नावीन्यपूर्ण व्यावसायिक बनविण्याचे स्वप्न, चौकटीबाहेरचे शिक्षण, शाळेत शिकण्यासाठी खेळणी आणि खेळ

शिक्षकांसाठी आमचा वारसा, अध्ययनपूरक वातावरण कौशल्याधारित शिक्षण, अभ्यासक्रमाचे कमी ओझे व भयमुक्त परीक्षा, शिक्षणातील भविष्यकालीन आव्हाने

पालकांसाठी माझे मुल, माझे शिक्षक, प्रौढ शिक्षण सर्वांना साक्षर बनविते, सर्व शिका आणि पुढे जा.