चांदूरबाजार (जि. अमरावती) : धावत असताना प्रचार करणाऱ्या वाहनांवर निवडणूक भरारी पथकाने कारवाई केली व ही वाहने चांदूरबाजार पोलिस ठाण्यात जमा करण्यात आली. त्यामुळे धावत्या वाहनातून प्रचार करण्याची भीती उमेदवार आणि त्यांच्या कार्यकर्त्यांच्या मनात भरली आहे. 
निवडणूक आयोगाने निवडणूक शिस्तीत व्हावी याकरिता नियम लावलेले आहेत. यामध्ये वाहन एका जागेवर थांबवून प्रचार करणे बंधनकारक असताना ती वाहने धावताना प्रचार करीत असल्याचे निदर्शनास आले. त्यामुळे निवडणूक भरारी पथकाने अशा वाहनांवर कारवाई केली. या कारवाईमध्ये सर्वपक्षीय वाहनांचा समावेश आहे. त्यामुळे संबंधिताना कारणे दाखवा नोटीस बजावण्यात आल्या आहेत. पुन्हा तेच वाहन धावत असताना प्रचार करीत असताना सापडल्यास त्यांच्यावर फौजदारी कारवाई करण्यात येणार असल्याचे पथक प्रमुख ललित बोबडे यांनी सांगितले. 
या कारवाईमुळे काही वेळेपर्यंत प्रचार थांबला होता. तसेच आता वाहनचालक नियमानुसार प्रचार करीत असल्याचे चित्र तालुक्‍यात दिसून येत आहे. ही कारवाई तालुक्‍यातील दोन भरारी पथकांनी संयुक्त केली असून, निर्णय अधिकारी संदीपकुमार अपार यांच्या मार्गदर्शनात पथक प्रमुख ललित बोबडे व दुसऱ्या पथकाचे प्रमुख निखिल नागे यांच्यासह पोलिस शिपाई जयेश परिवाले, अमर जवंजाळ, वाहनचालक अशफाक भाई, श्रीवास व श्री. मोरे यांनी ही कारवाई केली.