आमगाव (जि. गोंदिया) : इयत्ता बारावीचा निकाल नुकताच लागला. आम्ही गुणवंत ठरलो, आमचा सत्कारही झाला. मात्र, पुढील शिक्षणासाठी मोठ्या शहरांतील दारे लॉकडाउनमुळे बंद झाल्याने बारावीनंतर आमच्या करिअरचं काय? असा प्रश्‍न गुणवंत विद्यार्थ्यांनी विचारत चिंता व्यक्त केली आहे.
देश, राज्य नव्हे, तर जिल्ह्यातही कोरोना विषाणूचा मोठ्या प्रमाणात प्रादुर्भाव झाला आहे. त्यामुळे मानवी जीवन विस्कळीत झाले आहे. नुकताच बारावीचा निकाल लागून उत्तीर्ण झालेल्या विद्यार्थ्यांनाही लॉकडाउनचा फटका बसत आहे. बारावी परीक्षेचा निकाल दरवर्षीच्या तुलनेत यंदा जवळपास 50 दिवस उशिरा लागला.
18 मार्चला परीक्षा संपली. 22 मार्चपासून लॉकडाउन सुरू झाले. ते आजही कायम आहे. 22 मार्चनंतर शाळा, महाविद्यालयीन परीक्षा होऊ शकल्या नाहीत. मात्र, पूर्वपरीक्षांच्या आधारे विद्यार्थ्यांना सरसकट उत्तीर्ण घोषित करण्याचे आदेश शासनाने दिले. त्यानुसार, शालेय प्रशासनाला कार्यवाही करावी लागली. 16 जुलै रोजी बारावीचा निकाल घोषित झाला. गुणवंतांची नावे समोर आली. विद्यार्थी, पालक व त्यांच्या चाहत्यांना आनंद झाला. उत्तीर्ण विद्यार्थ्यांवर अभिनंदनाचा वर्षाव झाला.
गुणवंत प्रत्येक विद्यार्थी आवडीच्या क्षेत्रात पुढील प्रवेश घेण्याचे स्वप्न पाहू लागले. पुढील शिक्षण घ्यायचे झाल्यास मोठ्या शहरांशिवाय पर्याय नाही. मात्र, लॉकडाउनने या विद्यार्थ्यांना सध्यातरी घरीच बसा, असा सल्ला दिला आहे. कोरोनामुळे विद्यार्थ्यांचे भवितव्यच धोक्‍यात आले आहे. अभियांत्रिकी, वैद्यकीय व अन्य प्रवेशपूर्व परीक्षा लांबणीवर गेल्याने प्रवेश कसा करायचा?, प्रवेश झाल्यावरही वर्ग कधी सुरू होतील? याची कुठलीही शक्‍यता नाही. त्यामुळे यंदा बारावीनंतर शैक्षणिक भवितव्य अधांतरी असल्याची भीती विद्यार्थी-विद्यार्थिंनीमध्ये आहे.
गुणवंत विद्यार्थ्यांचा सत्कार कार्यक्रम आमगाव येथे काही दिवसांपूर्वीच घेण्यात आला. लोकप्रतिनिधींच्या हस्ते हा सत्कार झाला. या वेळी सुस्मिता महापात्रा, आकांक्षा वाघमारे, मधुमिता महापात्रा, प्रतिमा डोंगरवार, रजनी पटले, लक्षिता गावराने, शीतल मेंढे, अविनाश पाथोडे, अभिषेक टेंभरे, महेश ब्राह्मणकर, राहुल भांडारकर, अमित मेश्राम यांनी मनोगत व्यक्त करताना विविध क्षेत्रात जाण्याची इच्छा व्यक्त केली. परंतु, लॉकडाउनमुळे आवडीचे क्षेत्र, आवडीच्या शहरात जाता येणार नसल्याची खंतही व्यक्त केली.
(संपादन : दुलिराम रहांगडाले)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.