ः कन्हान (जि.नागपूर) :  दिवाळी तोंडावर आली. दिव्यांचा, प्रकाशाचा सण म्हणून दिवाळी साजरी केली जाते. बाजारात रंगीबेरंगी दिव्यांनी दुकाने सजलेली आहेत. मात्र स्वयंनिर्भरतेचा ध्यास ग्रामपंचायत वराडाअंतर्गत येणाऱ्या वाघोली येथील रमाई स्वयं साहाय्यता महिला बचतगटाने घेतला असून त्यांनी मेणाचे रंगीबेरंगी सुरेख दिवे तयार करून बाजारात आणले आहेत. या दिव्यांना अतिशय मागणी असल्याने बचतगटातील महिला या स्वयंरोजगारातून सक्षम होत आहेत. 
सध्याच्या काळात महिला कुटुंबाला सक्षम करण्यासाठी बचतगटाच्या माध्यमातून स्वयंरोजगारासाठी धडपडत आहेत. यातून केवळ कुटुंब नव्हे तर अख्खा समूह "स्वयंदीप' होत आहे. सामाजिक परिवर्तन अभियानांतर्गत ग्रामपंचायत वराडाच्या वाघोली गावात स्थापन करण्यात आलेल्या रमाई स्वयं साहाय्यता महिला बचतगटाने मेणाचे रंगीबेरंगी सुरेख दिवे तयार करून बाजारात आणले आहेत. या दिव्यांना बाजारात चांगली मागणी असल्याने गटातील महिला अध्यक्ष प्रतिभा अमित पौनिकर, सचिव आरती राजू मेश्राम, सदस्या सविता खोब्रागडे, संगिता पौनिकर, ओजंता पाटील, संघमित्रा वासनिक, ललिता उईके, मीना काकडे, सीता भोंडे, इंदू गजभिये या स्वयंरोजगारातून सक्षम होत आहेत. या गटाकरिता ग्रामपंचायत सदस्य राकेश काकडे, इंदूबाई गजभिये, ग्रामप्रेरक रूपेश चरडे यांनी सहकार्य केले. महिला गटाचे मेणाचे दिवे अतिशय सुरेख असून नागरिकांनी खरेदी करून सहकार्य करावे, असे आवाहन रमाई महिला बचतगटाच्या अध्यक्ष प्रतिभा पौनिकर, सचिव आरती मेश्राम यांनी केले आहे. ग्रामपंचायत वराडाच्या सरपंच विद्याताई चिखले, उपसरपंच उषाताई हेटे, सर्व सदस्य व ग्रामसचिव निर्गुण शेळकी यांनी रमाई महिला बचतगटाच्या महिलांच्या उपक्रमास शुभेच्छा दिल्या आहेत.