वर्धा : शासकीय सेवेतून कर्मचारी सेवानिवृत्त झाल्यानंतर मिळणाऱ्या लाभासाठी भटकंती होत असल्याचे अनेकदा पुढे आले आहे. वर्ध्यात आता असे होणार नाही. ही सर्व प्रक्रिया ऑनलाइन झाल्याने सोपी झाली आहे. सेवानिवृत्तांची प्रकरणे ऑनलाइन मार्गी काढण्याचा निर्णय घेणारी वर्धा ही विदर्भातील पहिली जिल्हा परिषद ठरली आहे.

सर्व प्रक्रिया ऑनलाइन करण्यासाठी जिल्हा परिषदेच्या वतीने ॲप विकसित करण्यात आला आहे. या ॲपचे नावच ‘सोपी’ (sopi-sydteem of pension illustrstion) असे ठेवण्यात आले आहे. यातून सर्वच प्रक्रिया ऑनलाइन होणार आहे. जिल्हा परिषदेच्या कोणत्याही विभागातील कर्मचारी सेवानिवृत्त झाल्यास मिळणाऱ्या लाभाची सर्वच प्रकरणे ऑनलाइन होणार असल्याने ती नेमकी कुठे अडत होती, याची माहिती होणार असल्याने संबंधित कर्मचाऱ्यावर कारवाई करणे सोपे होणार आहे.

वर्ध्यात येत्या महिन्यापासून सेवानिवृत्त होणाऱ्या कर्मचाऱ्यांच्या लाभाची प्रक्रिया ऑनलाइन सादर करण्याच्या सूचना सर्वच विभागांना देण्यात आल्या आहेत. सेवानिवृत्त होणाऱ्या कर्मचाऱ्याला त्याच्या सेवानिवृत्ताच्या दिवशीच हा लाभ मिळावा, असा या मागचा उद्देश असल्याचे जिल्हा परिषदेकडून सांगण्यात आले. ॲपची अंमलबजावणी करण्यासाठी आठ दिवसांचा काळ असल्याने या दिवसातच आठही पंचायत समित्यांनी सर्व माहिती अपडेट करण्याच्या सूचना विभागांना करण्यात आल्या आहेत.

सहा महिन्यांआधीच होणार प्रक्रिया

सेवानिवृत्त होणारा कर्मचारी या ॲपमधून शोधण्यात येणार आहे. कर्मचाऱ्यांच्या सेवानिवृत्तीच्या तारखेच्या सहा महिन्यांपूर्वीच प्रक्रिया सुरू करण्यास मदत होणार आहे. प्रक्रिया लवकर सुरू झाल्याने या कर्मचाऱ्यांना वेळीच लाभ देणे शक्य असल्याचे सांगण्यात येत आहे.