चिखली (जि. गोंदिया) : "तांदूळ तर मिळाले, पण आता भात कशासोबत खायचे' असा प्रश्न सरकारी स्वस्त धान्य दुकानातून मिळालेला तांदूळ घरी घेऊन आलेल्या जिल्ह्यातील गोरगरीब नागरिकांसमोर उभा ठाकला आहे. लॉकडाउनच्या काळात शासनाने प्रत्येक व्यक्तीमागे पाच किलो धान्य रेशनकार्डधारकांना वितरण सुरू केले आहे.

त्याचप्रमाणे प्रत्येक व्यक्तीमागे आता केवळ पाच किलो तांदूळ मिळत आहेत. परंतु भाजीचे साहित्य विकत घेण्यासाठी मजुरांकडे पैसे नसल्याने आता भात कशासोबत खायचा, असा प्रश्न गोरगरीब नागरिकांना सतावत आहे.

रोजगार हिरावल्याने मजूर झाले चिंताग्रस्त

लॉकडाउनमुळे गेल्या काही दिवसांपासून सर्व व्यवहार ठप्प झाले आहेत. हातावर आणून पानावर खाणाऱ्यांकडे सध्या एकही रुपया शिल्लक राहिला नाही. रोजगार हिरावल्याने त्यांची ही दशा झाली आहे. जवळ असलेले पै-पैसेही खर्च झाले. त्यामुळे त्यांची दोन वेळची चूल पेटणेही कठीण झाले आहे. लॉकडाउनच्या काळात गोरगरीब नागरिकांचे, मजुरांचे रोजगाराअभावी हाल झाले आहेत. सध्या त्यांच्या समोर कठीण दिवस आले आहेत.

गावातही त्यांना काम मिळेना

अनेक मजूर वेगवेगळ्या महानगर, शहरातून खेडेगावाकडे पोहोचले आहेत. आता त्यांना गावात कोणते काम मिळे, याचाही प्रश्न निर्माण झाला आहे. सध्या गावातील मजुरांना काम नाही; तर बाहेरून आलेल्यांना काम कसे मिळणार, पैसाच नाही तर चिमुकल्यांना जगवायचे कसे, असे अनेक प्रश्न निर्माण झाले आहेत. एकंदरीत या लॉकडाउनने गरिबांपुढे दोन वेळेच्या भोजनाचा प्रश्न निर्माण केला आहे.

जाणून घ्या : शेतकऱ्यांना तारणार यंदाचा खरीप हंगाम...करा नियोजन

शासनाने इतर साहित्यही द्यावे

शासनाने धान्यासोबत तेल, तिखट, मीठ दिले असते; तर बरे झाले असते, भातासोबत ते खाता आले असते, असा सूर गावखेड्यातील कामगार, मजूरवर्गातून निघत आहे. कोरोनाच्या संकटाने सर्व सामान्याचे जीवन संकटात सापडले आहे. अनेकांसमोर कठीण समस्या निर्माण झालेली आहे. सध्या सर्वत्र संचारबंदी सुरू आहे. आधी हे लॉकडाउन 3 मे रोजी संपणार असे सांगण्यात आले होते; परंतु लॉकडाउन आता 17 मेपर्यंत वाढविम्यात आले आहे. त्यामुळे मजुरांची दैन्यावस्था झाली आहे.