पुसद (जि. यवतमाळ) : पुसद येथील अजय विश्वकर्मा या युवा तंत्रज्ञाने उपयोजित तंत्रज्ञानाचा उपयोग करून संशोधनातून तयार केलेल्या 'मल्टिपर्पज वॉटर रजिस्टंट सोल्यूशन'या उत्पादनाला जागतिक बाजारपेठ उपलब्ध झाली आहे. पंतप्रधानांच्या आत्मनिर्भर भारतासाठी त्यांचा हा 'लोकल टू ग्लोबल' संशोधन प्रकल्प उल्लेखनीय ठरला आहे. 

पुसद येथील मोबाईल तंत्रज्ञानातील व्यावसायिक अजय विश्वकर्मा यांनी जिज्ञासू वृत्तीने काही नावीन्यपूर्ण संशोधन केले. त्यांनी तयार केलेले प्रकल्पाचे पेटेंट मंजूर झाले असून साई-वीर टेक्‍नॉलॉजी या माध्यमातून उत्पादनाच्या स्वरूपात बाजारपेठेत उपलब्ध झालेले आहे. यापैकी 'मल्टिपर्पज वॉटर रजिस्टंट सोल्यूशन' हे उत्पादन सरफेस माउंट डिवाइस कॉम्पोनंट व सरफेस माउंट टेक्‍नॉलॉजी यावर आधारित इलेक्‍ट्रॉनिक गॅजेट्‌समध्ये उपयोगात आणले जाते. 

सविस्तर वाचा - घरी काम करणाऱ्या मजुरांनी स्लॅब टाकण्याची केली तयारी अन् तेवढ्यात आला धडकी भरवणारा आवाज

हे उत्पादन म्हणजे एक प्रकारचे लिक्विड स्प्रे असून ते फवारल्यानंतर डिवाइसच्या पृष्ठभागाशी पाण्याचा संपर्क होऊ शकत नाही. त्यामुळे गंज तयार होऊ शकत नाही. आर्द्रता व गंज प्रतिरोधक गुणधर्मामुळे डिव्हाईसेसला संरक्षण मिळते. कम्युनिकेशन डिवाइसेस, लॅपटॉप आयपॅड, स्ट्रिटलाइट्‌स या पाण्याची भीती असलेल्या उपकरणात तसेच औद्योगिक क्षेत्रातील कुलर, बाथरूममधील दरवाजाच्या इंजिस, नट बोल्ट, स्क्रू यासाठी वापर होऊ शकतो. याच्या उत्पादन विक्रीची व्यवस्था एका कंपनीकडे सोपविण्यात आली आहे. या उत्पादनाची किंमत ग्राहकांना परवडणारी आहे. 
 

अधिक वाचा - कोरोना झालेल्या रुग्णांना फुप्फुसाचे विकार; पाच युवकांवर सुरू आहे नागपुरात उपचार
 

अजय विश्वकर्मा यांनी अभियांत्रिकी पदविका संपादन केली असून त्यांना नवनवीन संशोधनाची आवड आहे. यापूर्वी त्यांनी चोरांपासून सुरक्षितता मिळविण्यासाठी उपकरण तयार केले. कोविडमध्ये निर्जंतुकीकरण उपकरण तसेच मोबाईल पाण्यात पडला तरी त्याचे संरक्षण करण्यासाठी लिक्विड शोधून काढले. त्यांचे सातत्यपूर्ण संशोधन सुरू असून आणखी काही उत्पादनाचे त्यांना पेटंट मिळवायचे आहे. 

संपादन ः राजेंद्र मारोटकर