वरोरा (जि. चंद्रपूर) : तालुक्यातील पिंपळगाव (शिंगरू) या गावातील अल्पवयीन मुलीला फूस लावून राजस्थानमध्ये नेले व विवाह लावून दिल्याची तक्रार मुलीच्या पित्याने वरोरा पोलिस ठाण्यात दाखल केली आहे. त्यानंतर वरोरा पोलिसांच्या एक पथकाने राजस्थान गाठून तिघांना अटक केली व मुलीलाही गावात सुखरूप आणले. रामस्‍वरूप केसरीलाल बरवा (वय ३२), छोटूलाल माधवलाल बरवा आणि तस्वीर छोटूलाल बरवा अशी अटकेतील व्यक्तींची नावे आहेत.

पोलिसांनी दिलेल्या माहितीनुसार, तालुक्यातील पिंपळगाव (शिंगरू) येथील एका अल्पवयीन मुलीला रामस्वरूप केसरीलाल बरवा याने प्रेमाच्या जाळ्यात ओढले. काही दिवस त्यांचे प्रेमप्रकरण सुरू होते. त्याने अल्पवयीन मुलीस लग्नाचे आमिष दाखविले. मुलगी त्याच्या आमिषाला बळी पडली. रामस्वरूप बरवा याने अल्पवयीन मुलीस राजस्थान राज्यातील शाडोल (ता. विटवा, जि. कोठा) या गावी नेले. काही दिवस घालविल्यानंतर त्या मुलीसोबत विवाह करण्यात आला.

इकडे पिंपळगावात अल्पवयीन मुलगी बेपत्ता झाल्याने वडिलाने सर्वत्र शोधाशोध सुरू केली. मात्र, तिचा काहीच पत्ता लागला नाही. तिच्या मैत्रिणीची विचारपूस केली असता त्यांचे प्रेमप्रकरण समोर आले. अल्पवयीन मुलीस फूस लावून पळविल्याची तक्रार पित्याने वरोरा पोलिस ठाण्यात केली होती. तक्रारीची दखल घेऊन पोलिसांनी रामस्वरूप बरवा राहत असलेले राजस्थानीतील कोठा गाव गाठले. तेथून रामस्‍वरूप केसरीलाल बरवा, छोटूलाल माधवलाल बरवा, तस्वीर छोटूलाल बरवा या तिघांना अटक करून गुन्हा दाखल केला. अल्पवयीन मुलीला वडिलांच्या ताब्यात देण्यात आले. अधिक तपास वरोरा पोलिस करीत आहे.

चंद्रपूर, सिंदेवाहीत मुली विक्रीचे प्रकरण

जिल्ह्यात चंद्रपूर, सिंदेवाही येथे अल्पवयीन मुलींना लग्नाचे आमिष दाखवून विक्री करण्यात आल्याचे प्रकरण काही वर्षांपूर्वी उजेडात आले होते. या दोन्ही प्रकरणात पोलिसांनी एका टोळीचा पर्दाफाश केला होता. चंद्रपूर शहरातील बंगाली कॅम्प परिसरातील अल्पवयीन मुलीस गुंगीचे औषध देऊन बेशुद्ध करण्यात आले. काही महिन्यांनी तिची विक्री करण्यात आली होती. ती पळून चंद्रपुरात आल्यानंतर हे प्रकरण समोर आले होते. सिंदेवाही तालुक्यातील एका खेड्यातील दोन मुलींचीही नागपुरातील महिलेने विक्री केली होती. रेल्वे स्थानकावरून त्या पळून आल्यानंतर ते प्रकरण उजेडात आला होते.