नागपूर - संपूर्ण जगातील मराठी माणसांसाठी साहित्य संमेलन आयोजित करून त्यांना एका व्यासपीठावर आणणे हेच अखिल भारतीय मराठी साहित्य महामंडळाचे मुख्य कार्य आहे. पण, महामंडळच इतर उपक्रमांचे आयोजन करायला लागले, तर घटक संस्थांनी काय करायचे, असा सवाल महामंडळाचे नवे अध्यक्ष कौतिकराव ठाले-पाटील यांनी आज केला. संमेलनांच्या व्यतिरिक्त महामंडळ काय करतं, असा सवाल विचारणाऱ्यांसाठी आपली ही भूमिका असल्याचे त्यांनी स्पष्ट केले. 

अखिल भारतीय मराठी साहित्य महामंडळाचे कार्यालय आज विदर्भ साहित्य संघाकडून मराठवाडा साहित्य परिषदेकडे हस्तांतरित करण्यात आले.

विदर्भाच्या कार्यकाळातील अखेरची बैठक आज नागपुरात पार पडली. या बैठकीत महामंडळाच्या अध्यक्षपदी ठाले-पाटील, उपाध्यक्ष म्हणून विद्या देवधर, कार्यवाह दादा गोरे, तर कोषाध्यक्ष म्हणून रामचंद्र साळुंखे यांची सर्वानुमते निवड करण्यात आली. बैठकीनंतर ठाले-पाटील पत्रकारांशी बोलत होते. महामंडळाला संमेलनांच्या गर्तेतून काढण्याचा संकल्प डॉ. श्रीपाद भालचंद्र जोशी यांनी सोडला होता. त्याअनुषंगाने ठाले-पाटील बोलत होते.

‘देशभरातील मराठी भाषेचे आणि माणसाचे विस्कळितपण दूर करण्यासाठी अखिल भारतीय मराठी साहित्य महामंडळाची स्थापना करण्यात आली.

पण, चार घटक संस्थांच्या व्यतिरिक्त पाचवी संस्था म्हणून महामंडळाचा विचार होणार नाही, याचीही काळजी घेण्यात आली. त्यामुळे चर्चासत्र असो, ग्रामीण भागातील संमेलने असो याशिवाय विविध छोटे-मोठे उपक्रम घटक संस्थांनी घेणे अपेक्षित आहे. महामंडळाचे मुख्य काम वर्षातून एक संमेलन आयोजित करणे एवढेच आहे, असे ते म्हणाले.

संमेलनाध्यक्षांची निवडणूकच!
‘अकराशे लोकांनी केलेली संमेलनाध्यक्षांची निवडणूक आणि १९ लोकांनी केलेली निवड, असे कसे म्हणता येईल? एकमताने एखाद्या नावावर शिक्कामोर्तब झाले, तरच ती निवड म्हणता येईल. पण, यवतमाळच्या संमेलनापूर्वी अध्यक्षपदासाठी १९ लोकांनी वेगवेळ्या नावाच्या बाजूने मत दिले. त्यातून ज्या नावाच्या बाजूने अधिक मतं पडली, ते नाव अध्यक्षपदासाठी घोषित करण्यात आले. पण, त्यामुळे ती निवड ठरत नाही,’’, असे ते म्हणाले.