अकोला  ः पातूर येथील सात कोरोना पॉझिटिव्ह रुग्णांना गुरुवारी (ता.23) सर्वोपचार रुग्णालयातून डिस्चार्ज मिळाला आहे. हे सातही रुग्ण झाले बरे झाले असून, पातूरच्या सातही रुग्णांनी कोरोनावर विजय मिळविला आहे. अकोलेकरांसाठी ही दिलासादायक बाब आहे. 

प्रशासनाने वाजविल्या टाळ्या
डिस्चार्ज देतेवेळी जिल्हाधिकारी जोतेंद्र पापळकर यांच्यासह वैद्यकीय महाविद्यालयाचे अधिष्ठाता डॉ. कुसुमाकर घोरफडे, जिल्हा शल्य चिकित्सक डॉ. राजकुमार चव्हाण, निवासी उप जिल्हाधिकारी प्रा. संजय खडसे, एसडीएमम डॉ. नीलेश अपार यांच्यासह इतर डॉक्टर व अधिकारी यांनी टाळ्या वाजवून बरे झालेल्या रुगांचे स्वागत केले.

तीन जणांचे अहवाल पाॅझिटिव्हच
अकोल्यात आतापर्यंत 16 कोरोना रुग्ण आढळून आले होते. यापैकी पातूर येथील सात कोरोनाबाधित रुग्णांचे सर्वच्या सर्व अहवाल निगेटिव्ह आल्याने या रुग्णांना गुरूवारी डिस्चार्ज देण्यात आला. तर गुरुवारी दुपारी प्राप्त झालेल्या 21 अहवालापैकी 18 जणांचे अहवाल निगेटिव्ह आले तर तीन जणांचे चौथ्या चाचणी अखेरही अहवाल पॉझिटिव्ह आले आहे. दरम्यान आज दुपारी पातूर येथील सात जणांना पूर्ण उपचारानंतर बरे झाल्याने घरी सोडण्यात आले. अशी माहिती शासकीय वैद्यकीय महाविद्यालयाने दिली आहे.