शेगाव (जि.बुलडाणा) : शेगाव ते पंढरपूर या संत गजानन महाराज पायीवारी पालखी मार्गाचे रुंदीकरणाचे काम शेगाव-अकोला मार्गावर गेल्या वर्षीपासून सुरू होते. परंतु गेल्या महिनाभरापासून ठेकेदाराने शेगाव नागझरी रोडवरील गाशा गुंडाळल्याचे चित्र समोर आले आहे.

शेगाव-नागझरी या बुलडाणा जिल्ह्यातील टोकाच्या दोन तिर्थक्षेत्राला जोडणारा आणि अकोला जिल्ह्यात केवळ 35 कि. मी. लांबीच्या रस्त्याचे रुंदीकरणाचे काम मागच्या सरकारच्या काळात जोरात सुरू झाले होते. झाडे कटाई रस्ता रुंदीकरण, पुल विकास, नाली बांधकाम असे काम वेगाने सुरू होते. त्यामुळे जवळपास पाच ते सहा किमी पर्यतचा एका बाजुचा शेताकडील रस्ता पाच फुट खोदुन किंवा अर्धवट नाली बांधून ठेवला आहे.

बापरे! - दोन वर्षीय चिमुकलीला पाण्यात बुडवून आईचीही जाळून घेत आत्महत्या

ठेकेदार गेला; साहित्यही नेले
गेल्या काही महिन्यापासून हे बांधकाम अर्धवट सोडून ठेकेदार गेला आहे. सर्व वाहन साहित्य, बांधकाम मटेरीयल उचलून नेले. काही ठिकाणी सब ठेकेदाराचे रोजंदारीवरील मजूर राखणं ठेवले असून, त्यांना बंद कामाची कोणतीच माहिती नाही. आम्हीच रोजगाराची वाट पाहत आहोत असे ते म्हणतात, पैशा अभावी काम बंद झाल्याची चर्चा शेतकरी करतात. सरकार बदल्यामुळे चालु काम बंद पडले असेही बोलल्या जाते. हे काम अकोल्यापर्यंत आहे. पण पुढची माहिती कोणालाच नाही. 

खोदकामामुळे शेतकऱ्यांची पार दैना
शेतकऱ्यांची मात्र पार दैना करून गेले आहे. रस्त्याचे बाजुला पाच, सहा फुटाची नाली खोदुन काही ठिकाणी बांधकाम अर्धवट अवस्थेत ठेवल्यामुळे शेतकऱ्यांचा शेतात जाण्या-येण्याचा रस्ता बंद झाला आहे. परंतु कोणीही याची जबाबदारी घेण्यास तयार नाही. येत्या काही दिवसांत तूर, कापूस पीकांची वाहतूक शेतकऱ्याना करायची आहे. ती कशी करणार शेतकऱ्यांचे कैवारी असलेले सरकारने त्वरीत लक्ष द्यावे, मागणी हे शेतकरी करत आहेत. तसेच बांधकामाच्या क्वालिटीकडे लक्ष देण्याची गरज आहे अशीही मागणी होत आहे.