अमरावती ः घरात घुसून ओळखीतील व्यक्तीने पत्नीसोबत असभ्य वर्तन केल्यामुळे चिडलेल्या पतीने आपल्या मेहूण्याला सोबत घेऊन एकाचा खून केला. पाच दिवसानंतर विहिरीत सापडलेल्या मृतदेहाचे रहस्य अखेर उलगडले.
दिलीप रामराव वरठी (वय 30, रा. रंभा, भैसदेही, मध्यप्रदेश) असे खून झालेल्या व्यक्तीचे नाव आहे. रविवारी (ता. 23) रात्रीच्या सुमारास चिखलदरा तालुक्‍यातील एकताई गावात ही घटना घडली. याप्रकरणी संतुलाल भुता बेठेकर (वय 29) व त्याचा मेहूणा संजुलाल राजमा तोटे (वय 26, रा. कुणखेडी, भैसदेही) या दोघांना अटक करून त्यांच्याविरुद्ध खून व पुरावा नष्ट केल्याप्रकरणी चिखलदरा पोलिसांनी गुन्हा दाखल केला. असे पोलिस निरीक्षक आकाश शिंदे यांनी सांगितले.  

हे वाचा—ईशारा देऊनही रेल्वे रुळावरून चालवत राहिले गाडी.. अन घडली अंगाचा थरकाप उडवणारी घटना

एकताई येथील बबलू बेठेकर यांच्या विहिरीत दिलीप वरठी यांचा मृतदेह 23 ऑगस्ट रोजी आढळला होता. प्रारंभी पोलिसांनी अकस्मात मृत्यू अशी नोंद घेतली.  चिखलदरा पोलिसांनी या प्रकरणाची चौकशी सुरू केली. घटनेच्या एका दिवसापूर्वी 22 ऑगस्ट रोजी रात्रीचे वेळी दिलीप वरठी याने संतुलालच्या घरात घुसून त्याच्या पत्नीशी अश्‍लील वर्तन केले होते.  त्यामुळे चिडून संतुलालने मेहूणा संजूलालच्या मदतीने वरठी यास गाठले. काठीने प्रहार करून दिलीपचा खून केल्यावर पुरावा नष्ट करण्यासाठी मृतदेह विहिरीत फेकला. अशी कबुली संतूलाल व संजूलाल या दोघांनी दिली. न्यायालयाने दोघांनाही सोमवारपर्यंत (ता. 31) पोलिस कोठडीत ठेवण्याचे आदेश दिले.

शवविच्छेदन अहवाल प्राप्त झाला. त्यात दिलीप वरठी याला आधी काठीने मारहाण करून खून केल्यानंतर मृतदेह विहिरीत फेकल्याची बाब नमुद आहे. त्यामुळे हा गुन्हा दाखल झाला.
- आकाश शिंदे, पोलिस निरीक्षक, चिखलदरा
 

-संपादन ः चंद्रशेखर महाजन