गडचिरोली : गडचिरोली नगर परिषदेच्या अध्यक्ष योगिता पिपरे यांनी खासगी वाहन वापरून खर्चाचे प्रतिपूर्ती देयक नगर परिषदेकडून प्राप्त केल्याचा ठपका ठेवत नगरविकास विभागाचे कार्यासन अधिकारी प्रवीण पाटील यांनी त्यांना कारणे दाखवा नोटीस बजावली आहे. त्यामुळे आधीच अनेक अडचणींचा सामना करणाऱ्या नगराध्यक्ष पिपरे यांच्या अडचणींमध्ये वाढ झाली आहे.

नगराध्यक्ष पिपरे यांना अपात्र ठरविण्याचे प्रयत्न काही महिन्यांपासून सुरू आहेत. आता या कारणे दाखवा नोटीसमुळे त्यांच्यावर अपात्रतेची टांगती तलवार आहे. या नोटीसमध्ये त्यांच्यावर अनेक आरोप करण्यात आले आहेत. नोटीसमध्ये म्हटले आहे की, नगराध्यक्ष योगिता पिपरे यांचे पती प्रमोद पिपरे हे स्वीकृत सदस्य आहेत. त्यांना नगर परिषदेच्या सभेत मत देण्याचा किंवा कोणताही ठराव मांडण्याचा अधिकार नाही. तरीही ते नगर परिषदेच्या कामकाजात प्रत्यक्ष हस्तक्षेप करतात.

जाणून घ्या - आधार कार्ड काढताय? थांबा १५ दिवस!

स्वत:चे वाहन वापरून त्याच्या खर्चाचे प्रतिपूर्ती देयक नगर परिषदेकडून प्राप्त करून घेतले आहे. तसेच आदर्श आचारसंहितेच्या काळातही नियमबाह्य स्वत:च्या वाहनाचा वापर करून प्रतिपूर्ती बिलाची रक्‍कम नगर परिषदेकडून घेतली.

या गैरवर्तनाबद्दल आपल्याला नगर परिषदेच्या अध्यक्षपदावरून दूर करून पुढील ६ वर्षांसाठी पालिका सदस्य होण्यास किंवा कोणत्याही इतर स्थानिक प्राधिकरणाचा सदस्य होण्यास अपात्र का करण्यात येऊ नये, अशी नोटीस बजावली.

याचा लेखी खुलासा नोटीस प्राप्त झाल्यापासून १५ दिवसांच्या आत सरकारला सादर करावा, अन्यथा पुढील कार्यवाही करण्यात येईल, असेही नोटीसमध्ये कार्यासन अधिकारी प्रवीण पाटील यांनी म्हटले आहे. 

अधिक माहितीसाठी - नितीन गडकरी म्हणाले, दोन महिन्यांत नागपूर विभाग डिझेलमुक्‍त करणार; इथेनॉलवर चालणार वाहने

सर्वांशी चर्चा करून निर्णय घेणार
नोटीस मिळाली असून आम्ही आमच्या वकिलांशी संपर्क साधला आहे. नोटीसचे उत्तर कशाप्रकारे द्यायचे, यासंदर्भात वकिलांच्या सल्ल्यानुसार व सर्वांशी चर्चा करून निर्णय घेणार आहे.
- योगिता पिपरे,
अध्यक्ष, नगर परिषद, गडचिरोली