अमरावती: आजकाल लोकांचे भांडण कुठल्या थराला जाईल काहीही सांगता येत नाही. या भांडणांचे रूपांतर हाणामाऱ्यांमध्ये किंवा गुन्ह्यांमध्ये होण्यास वेळ लागत नाही. अशाच काही घटना अमरावती जिल्ह्यत घडल्या आहेत.
ग्रामिण भागात सहा ठिकाणी क्षुल्लक कारणावरून वाद होऊन मारामारीच्या घटना घडल्या. त्यात आठ जण जखमी झाले. एकाठिकाणी नाश्ता दिला म्हणून तर, दुसऱ्या ठिकाणी महिलेला कुत्रा चावल्याने दोन गट समोरासमोर भिडले.
चांदुररेल्वे परिसरात संजय रामदास तांडेकर (वय 30) सोबत किसन खडसे याला नाश्ता का दिला यावरून शेख जफर शेख हसन (वय 27) याने भांडण केले. काठीने मारहाण केली. त्यात तांडेकर जखमी झाले.
मारामारीची दुसरी घटना चिखलदरा तालुक्याच्या रामटेक येथे घडली. एकमेकांचे शेजारी असलेल्या सुरेश छोटेलाल जामकर (वय 52) यांच्या वडिलांनी सुनील रामु बेलसरे याचा कुत्रा सुनेला चावला, यावरून वाद घातला. लाकडी काठीने मारहाण करून जखमी केले. जखमीचा मुलगा सुरेश यांच्या तक्रारीवरून चिखलदरा पोलिसांनी बेलसरेविरुद्ध गुन्हा दाखल केला.
धारणी तालुक्यात गोलाई येथे एकाच ठिकाणी दुसरा पाळणा बांधण्याच्या कारणावरून अयोध्या बालाजी नागरगोजी यांच्याशी सूर्यभान रघुनाथ नागरगोजी यांनी वाद घातला. घराच्या कंपाउंडची काठी उपटून मारहाण केली. त्यात महिला जखमी झाली. जखमीच्या तक्रारीवरून सुर्यभानविरुद्ध गुन्हा दाखल झाला.
धारणीतील काटकुंभ येथे राघू कालू डुंडवा (वय 27) सोबत सिद्धार्थ गप्या डावरे याने वाद घातला. सिद्धार्थने रघू यास चावा घेऊन जखमी केले. जखमीचे तक्रारीवरून डावरेविरुद्ध गुन्हा नोंदविला.
शेंदुरजनाघाट हद्दीत पुसला गावात दिलीप जिरापुरे याने उधार दिलेले पैसे मागितले असता, त्यांच्यासोबत रामकिसन उर्फ गोविंदा याने वाद घातला. विळ्याने हल्ला केला. त्यात दिलीप जिरापुरे जखमी झाले. जखमीचा पुतण्या राजेश बाबाराव जिरापुरे यांच्या तक्रारीवरून शेंदुरजनाघाट पोलिसांनी रामकिसन विरुद्ध गुन्हा दाखल केला.
मंगरुळदस्तगीर हद्दीत रघूनाथपुर येथे नंदा पांडुरंग रेवाळे (वय 50) यांच्या मुलासोबत राहुल माणिकराव ठाकरे यानी वाद घालून मारहाण केली. त्यात महिलेचा मुलगा जखमी झाला.
संपादन - अथर्व महांकाळ
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.