यवतमाळ : यंदा खरिपाच्या सुरुवातीपासूनच दमदार पाऊस आहे. त्यामुळे पिकेही जोमदार आहेत. यावर्षी महाराष्ट्रात सोयाबीनचे जास्त पीक होईल, अशी आशा आहे. सध्या सोयाबीन काढणे सुरू असून बाजारभावात (soybean rate) घसरण झाल्याने शेतकर्‍यांची चिंता वाढली आहे. यंदाही शेतकरी अस्मानी संकटांसोबत सुलतानी संकटाचा सामना करीत आहे. राज्यातील लातूर, परभणी व विदर्भातील घाटंजी या ठिकाणी हमी भावापेक्षाही कमी भाव सोयाबीनला मिळाला.

यावर्षी महाराष्ट्रात सोयाबीनचा पेरा वाढला आहे. 38 लाख हेक्टरवरून 46 लाख हेक्टरवर सोयाबीनची पेरणी झाली. प्रथमच इतका मोठा पेरा वाढला आहे. अनुकूल हवामान व समाधानकारक पावसामुळे यंदा सोयाबीनचे बम्फर पीक होईल, अशी सर्वांनाच अपेक्षा आहे. सध्या शेतशिवारात सोयाबीन काढणीला वेग आला आहे. परंतु, अतिपावसाने धोका वाढविला आहे. ऐन काढणीदरम्यान रोज पाऊस येत आहे. त्यामुळे शेंगा शेतातच तडकत आहेत. शेंगांना कोंबे फुटली आहेत. नैसर्गिक संकटाचा सामना सुरू असताना बाजारात सोयाबीनचे भाव गडगडले. गेल्या पंधरवड्यात साधारणत: 2200 ते 2300 रुपयांनी भाव कमी झाले आहेत. गेल्या वर्षीच्या तुलनेत आठ हजारांनी भाव घटले आहेत. सोयाबीन निघताच भाव घसरल्यामुळे शेतकर्‍यांच्या चेहर्‍यावरील आनंद लोपला आहे. यावर्षी सोयाबीनला 3,950 रुपये प्रतिक्विंटल इतका हमी भाव आहे. आजच्या तारखेत सोयाबीनचे दर प्रतिक्विंटल 5,500 ते 6,000 हजार रुपये असले तरी काल (ता. 24) कारंजा (जि. वाशीम) येथील बाजार समितीत 400 क्विंटल सोयाबीनची आवक झाली. तसेच सर्वाधिक 6,450 रुपये व सर्वांत कमी 6,400 रुपये इतका दर मिळाला. आवक वाढताच दर आणखी कमी होण्याचा धोकाही शेतकर्‍यांना सतावत आहे. यवतमाळ जिल्ह्यात सतत पाऊस सुरू असल्याने अद्याप सोयाबीनची आवक वाढली नाही. ऑगस्ट 2021 मध्ये उच्चांकी दहा हजार दर मिळाला. तर चार सप्टेंबरपासून भावाची घसरगुंडी सुरू झाली. ऑगस्ट ते सप्टेंबर या दोन महिन्यांतच चार हजार ते साडेचार हजार रुपयांनी भाव घटले. त्यामुळे शेतकर्‍यांमध्ये संताप व्यक्त केला जात आहे.

सोयाबीनचे दर (प्रतिक्विंटल)

ऑगस्ट : 10,000 रुपये

सप्टेंबर

• पाच सप्टेंबर : 9000 रुपये

• 12 सप्टेंबर : 8600 रुपये

• 16 सप्टेंबर : 8400 रुपये

• 19 सप्टेंबर : 8000 रुपये

• 20 सप्टेंबर : 7000 रुपये

• 21 सप्टेंबर : 6100 रुपये

• 24 सप्टेंबर : 5800 रुपये

• 25 सप्टेंबर : 5500 रुपये