भंडारा : जिल्ह्यात कोरोना संकटापासून बचाव करण्यासाठी जिल्हा व तालुकास्तरावर कोविड केअर सेंटर तयार करण्यात आले आहेत. या सेंटरमध्ये आरोग्य विभागातील अधिकाऱ्यांसोबत खासगी युवक-युवतींनी आपला जीव धोक्‍यात टाकून रुग्णसेवा केली. परंतु, त्यांना गेल्या चार महिन्यांपासून वेतन मिळालेच नाही.

त्यामुळे त्यांच्यावर उपासमारीची वेळ आली आहे. त्वरित वेतन देण्याच्या मागणीसाठी सोमवारी या कर्मचाऱ्यांनी जिल्हाधिकारी यांना निवेदन दिले आहे.

देशात मार्च महिन्यापासून कोरोना संकटामुळे लॉकडाउन व जिल्हाबंदी करण्यात आली. शिक्षण, रोजगारासाठी बाहेर जिल्ह्यात गेलेल्या लोकांपासून कोरोनाचा संसर्ग होण्याची शक्‍यता असल्याने प्रशासनाने जिल्हा व तालुकास्तरावर विलगीकरण केंद्र व कोविड केअर सेंटर तयार केले.

अवश्य वाचा :  तुम्हालाही जेवण झाल्यानंतर लगेच पाणी पिण्याची सवय आहे? मग जरा थांबा आधी हे वाचा

कर्मचारी पॉझिटिव्ह येण्याची शक्यता

यात बाधित व्यक्तींच्या सेवेसाठी स्थानिकस्तरावर कर्मचाऱ्यांची नियुक्ती करण्यात आली. कोविड केअर सेंटरमध्ये काम करताना बाधित रुग्णांच्या संपर्कात आल्यास हे कर्मचारी कोरोना पॉझिटिव्ह येण्याची शक्‍यता आहे; तरीही हाताला काम पाहिजे म्हणून हे कर्मचारी रुग्णांची सेवा करत आहेत. मात्र, गेल्या चार महिन्यांपासून त्यांना वेतन मिळालेच नाही. याबाबत वरिष्ठांकडे वारंवार विचारणा केली. परंतु, आजचे वेतन उद्या मिळेल, या आशेवर हे कर्मचारी काम करत आहेत.

कुटुंबावर उपासमारीची वेळ

आता चार महिन्यांचा कालावधी लोटला असून, वेतन मिळत नसल्याने कर्मचाऱ्यांच्या कुटुंबावर उपासमारीची वेळ आली आहे. त्यामुळे कोविड केअर सेंटरमधील महिला व पुरुष कर्मचाऱ्यांच्या शिष्टमंडळाने आज, सोमवारी जिल्हाधिकारी यांची भेट घेऊन त्यांना आपल्या व्यथा सांगितल्या. या शिष्टमंडळात प्रीती कांबळे, सनाया शेख, चंदा गिरी, सरिता उके, आरिफ शेख, अभिषेक कुचेकर, मनीष बांते, शुभम बोकडे, महेंद्र नागदेवे शुभम सार्वे आदींचा समावेश होता.

जाणून घ्या :  तिरोडी रेल्वे मार्गाच्या विद्युतीकरणास वेग; मध्य भारतातून जाणारा महत्वपूर्ण मार्ग

अधिकाऱ्यांचे दुर्लक्ष कायम

शासनाने कोरोना आजाराचा मुकाबला करण्यासाठी युद्धस्तरावर तयारी केली आहे. इतर विभागांचा निधी कोरोना संसर्ग थांबवण्यासाठी वळविला आहे. त्यामुळे कोरोना प्रतिबंधक उपाययोजनांसाठी निधीची कमतरता नाही. परंतु, दरमहा नियमितपणे त्याची बिले सादर करण्याकडे दुर्लक्ष होण्याची शक्‍यता आहे. याकडे अधिकाऱ्यांनी दुर्लक्ष केल्याने कोविड केअरमधील लहान कर्मचाऱ्यांना त्रास सहन करावा लागत आहे.

(संपादन : दुलिराम रहांगडाले)