चंद्रपूर : बल्लारपूर मतदारसंघातील दुर्गापूर मतदान केंद्रातील ईव्हीएम मशीन घेऊन जाणा-या खासगी वाहनाला काही लोकांनी अडवल्यानंतर येथे तणावपूर्ण वातावरण निर्माण झाले आहे. जिल्हा प्रशासनाने दंगा नियंत्रण पथक बोलाविले आहे. तीन हजारपेक्षा अधिक लोकांनी ईव्हीएम असलेल्या वाहनाला घेरले आहे. रात्री उशिरापर्यंत दुर्गापूर परिसरामध्ये तणाव होता. 
राज्याच्या विधानसभा निवडणुकीसाठी आज मतदान पार पडले. बल्लारपूर विधानसभा मतदारसंघात येणाऱ्या दुर्गापूर येथे पाच मतदान केंद्रे होती. सायंकाळी मतदान पार पडल्यानंतर मतदार केंद्रातून निवडणूक अधिकाऱ्यांचे पथक ईव्हीएम हातात घेऊन बसस्थानकाकडे जात होते. दरम्यान या पथकावर लोकांना संशय आल्याने त्यांनी त्यांचा पाठलाग केला. यामुळे पथकातील अधिकारी घाबरले आणि पळून गेले. मात्र, अधिकाऱ्यांच्या मागे असलेले वाहन जमावाच्या हाती लागले. त्यात तीन ईव्हीएम आढळल्या. त्यावरून मतदान यंत्राची चोरी झाल्याची चर्चा पसरली. शेकडो लोकांचा जमाव घटनास्थळी जमा झाला. रात्री उशिरापर्यंत तीन हजारांपेक्षा अधिक लोक येथे गोळा झाले होते. तसेच कॉंग्रेसचे उमेदवार डॉ. विश्‍वास झाडे, बहुजन वंचित आघाडीचे उमेदवार राजू झोडे हे कार्यकर्त्यांसह तिथे पोहोचले. पाच मतदार केंद्रात आठ ईव्हीएम होत्या. यातील तीन जमावाच्या हाती लागल्या असे सांगतात. मात्र, याबद्दल अधिकृत तपशील मिळाला नाही. वाहनात सापडलेल्या तिन्ही ईव्हीएम या डेमो मशीन असल्याचे पोलिसांचे म्हणणे आहे. उशिरापर्यंत या परिसरात लोकांनी घेराव घातला होता. पोलिसांनी डेमो मशीन असलेले वाहन घेऊन जाण्याचा प्रयत्न केला असता काही महिलांनी लोटांगण आंदोलन केले. तर कोणतीही अनुचित घडू नये म्हणून पोलिसांनी दंगा नियंत्रण पथकाला पाचारण केले असून परिसरात पोलिसांनी चोख बंदोबस्त ठेवला आहे. राज्याचे अर्थमंत्री सुधीर मुनगंटीवार हे या मतदारसंघात उमेदवार आहेत.  

 
.