अमरावती : पेट्रोल-डिझेलची दरवाढ तातडीने मागे घेण्यात यावी, "मॉबलिंचिंग'च्या घटनांना आळा घालण्यासाठी कायदा तयार करण्यात यावा तसेच शहरातील कायदा व सुव्यवस्थेबाबत त्वरित कार्यवाही करावी, अशी मागणी शहर कॉंग्रेसतर्फे बुधवारी जिल्हाधिकाऱ्यांना निवेदनातून करण्यात आली.
केंद्र सरकारने अर्थसंकल्पात पेट्रोल-डिझेलवर प्रतिलिटर 2.50 रुपये वाढ केली. या दरवाढीच्या माध्यमातून आर्थिक लूट केली जात आहे. त्याचा फटका उद्योग, लघुउद्योगाला बसून वाहतूक महागणार आहे. 1 जुलै 2017 ला पेट्रोल 63 रुपये तर डिझेल प्रतिलिटर 58 रुपये होते. आता पेट्रोल 79.76 रुपये प्रतिलिटर तर डिझेल 70.96 रुपये प्रतिलिटर आहे. दोन वर्षांत पेट्रोल 17 रुपयांनी तर डिझेल 13 रुपयांनी वाढले आहे, असे सांगत ही दरवाढ मागे घेण्याची मागणी कॉंग्रेसने केली.
देशात मॉबलिंचिंगच्या घटना सतत घडत आहे. यावर आळा घालण्यासाठी प्रभावी कायदा तयार करण्यात यावा. शहरात भररस्त्यात महाविद्यालयीन तरुणीचा चाकूने भोसकून खून करण्यात आला. ही घटना अत्यंत दुर्देवी असून त्याबाबत तातडीने पावले उचलण्यात यावी, अशीही मागणी निवेदनातून करण्यात आली.