यवतमाळ : केळापूर तालुक्‍यात टिपेश्वर अभयारण्यालगत असलेल्या गावांत वाघाने धुमाकूळ घातला आहे. वाघाच्या हल्ल्यात गावकरी जखमी होत असून, शेतकऱ्यांची व जनावरांची शिकार होत आहे. त्यामुळे वाघाचा नागरी वस्त्यांमध्ये प्रवेश होणार नाही, यासाठी उपाययोजना कराव्यात, असे निर्देश वनमंत्री तथा पालकमंत्री संजय राठोड यांनी वनविभागाच्या अधिकाऱ्यांना दिले आहेत.

शासकीय विश्रामगृहात कोपामांडवी, अंधारवाडी, टेंभी व पाटणबोरी येथील गावकरी व वनविभागाच्या अधिकाऱ्यांसोबत वनमंत्री राठोड यांनी शनिवारी बैठक घेतली. यावेळी अपर प्रधान मुख्य वनसंरक्षक एम. एस. रेड्डी, यवतमाळचे मुख्य वनसंरक्षक रामाराव, जि. प. सदस्य गजानन बेजंनकीवार, यवतमाळचे उपवनसंरक्षक केशव वाबळे, पांढरकवडाचे उपवनसंरक्षक सुभाष दुमारे, विभागीय वनअधिकारी संदीप चव्हाण, पराग पिंगळे, राजेंद्र गायकवाड, कोपामांडवीचे सरपंच हनमंत कायपल्लीवार आदी उपस्थित होते.

अधिक वाचा - ग्राहकांनो खुशखबर! सोने- चांदीच्या भावात तब्बल इतक्या हजारांची घसरण; खरेदीसाठी ‘अच्छे दिन'

नरभक्षक वाघासंदर्भात उपाययोजना करण्यासाठी २० जणांच्या टीमने दिवसरात्र पेट्रोलिंग करावे, लोकांच्या संपर्कात राहून गावकऱ्यांना धीर द्यावा. वाघाला पकडण्यासाठी रॅपिड रेस्क्‍यू टीम व विशेष व्याघ्रसंरक्षण दल वाहनांसह तैनात करावी, गावकऱ्यांना आपापली जनावरे चराईसंदर्भात जमीन उपलब्ध करून देण्याबाबत शासनाकडे प्रस्ताव मांडण्यात येईल, असेही वनमंत्री राठोड म्हणाले.

टिपेश्वर अभयारण्यालगत असणाऱ्या गावांतील शेतकऱ्यांनी मागणी केल्यास त्यांना ७५ टक्‍के अनुदानावर सोलर फेंन्सिगचा लाभ द्यावा, अभयारण्यालगत तारेचे कुंपण घालावे, जेणेकरून वन्यप्राणी नागरी वस्त्यांत येणार नाहीत. वन्यप्राण्यांकडून होणारी नुकसानभरपाई संबंधित शेतकऱ्यांना तत्काळ उपलब्ध करून द्यावी, असे निर्देशही वनमंत्र्यांनी दिले.

अधिक माहितीसाठी - .. तर विदर्भात महापूर आलाच नसता.. महापुराला जबाबदार कोण? ऐतिहासिक विसर्ग करण्याची खरंच गरज होती का?

नुकसान झालेल्या गावकऱ्यांना धनादेश वाटप

वाघाच्या हल्ल्यात पशुधनाचे नुकसान झालेल्या गावकऱ्यांना वनमंत्री राठोड यांच्या हस्ते एकूण दोन लाखांचे धनादेश वाटप करण्यात आले. यात सुकळी येथील रामबाई आत्राम यांना ३० हजार, टेंभी येथील सागर रामगिरवार (३० हजार), गजानन शेंडे (२१ हजार), संतोष सैपटवार (१८,७५०), सुन्ना येथील अरुण जिड्डेवार (१९,५००), विजय एंबडवार (१८,७५०), टेंभी येथील यादव बडवाईकर (१६,५००), अंधारवाडी येथील लिंगा मेश्राम (१५ हजार), इंद्रदेव कुमरे (७,५००), कोब्बई येथील मोरेश्वर कुमरे (११,२५० रुपये), टेंभी येथील पंचफुला सोयाम (११,२५० रुपये) यांना धनादेश देण्यात आले. या बैठकीला वनविभागाचे अधिकारी व राहुल ताडविल्लेवार, सुभाष मेश्राम, गंगारेड्डी सुनकरवार यांच्यासह आदी गावकरी उपस्थित होते.

संपादन - नीलेश डाखोरे