वर्धा : शेतकरी आंदोलनाची व्याप्ती वाढविण्यासाठी शेतकरी नेते राकेश टीकेत यांची महापंचायत आयोजित करण्यात आली होती. यात शेतकरी मोठ्या सख्येने सहभागी होतील याची भीती शासनाला असल्याने कोरोनाचे कारण काढून त्यांची पंचायत रद्द करण्याचा रडीचा डाव खेळल्याचा आरोप दिल्ली येथून विदर्भाच्या दौऱ्यावर असलेले हरियाना भारतीय किसान आंदोलनाचे प्रवक्ता तेजबीरसिंग यांनी केला.

बजाज चौक परिसरात दिल्ली येथील शेतकरी आंदोलनाच्या समर्थनार्थ वर्ध्यातील ४० संस्थांनी एकत्र येत ६८ दिवसांपासून आंदोलन सुरू केले आहे. या आंदोलनात दिल्ली येथून आलेल्या शेतकऱ्यांनी यवतमाळपर्यंत काढलेली रॅली वर्ध्यात दाखल झाली. यावेळी ते बोलत होते.

जाणून घ्या - यवतमाळ जिल्ह्यात 28 फेब्रुवारीपर्यंत संचारबंदी; जिल्हाधिकाऱ्यांचे आदेश; जाणून घ्या नियम

यावेळी संयुक्त किसान मोर्चाचे श्रीकांत तराळ, महासंयुक्त मोर्चाचे अध्यक्ष संदीप गिट्‌टे पाटील, पंजाब प्रांतातील नेते अमनदिपसिंह घुम्मत, उत्तर प्रदेशचे किसान नेते गुरुअमनीतसिंह मांगत, गुरुद्वारा प्रमुख गुरुविंदरसिंग, रवींद्रसिंग आदींनी मार्गादर्शन केले.

आंदोलन मंडपात अतिथीचे स्वागत करण्यात आले. आंदोलनाची भूमिका आणि शासनाचा डाव महासंयुक्त मोर्चाचे अध्यक्ष संदीप गिट्टे पाटील यांनी विषद केली. संचालन यशवंत झाडे यांनी केले. आभार किसान अधिकार अभियानचे मुख्य प्रेरक अविनाश काकडे यांनी केले. संजय भगत, असलम पठाण, पूजा जाधव, प्रा. सूचीता ठाकरे, विद्या राईकवार, ललिता कुकडे, श्रेया गोडे यांनी परिवर्तनाची गीते सादर केली.

अधिक वाचा - जिल्हाधिकारी, 'एसपीं'च्या नववधू-वरांना शुभेच्छा!

आंदोलनाची खरी सुरुवात

वर्धा ही महात्मा गांधी आणि पंजाब भगतसिंहाची भूमी आहे. या भूमितील शेतकऱ्यांची आता कुठे भेट झाली आहे. ही तर पुकारलेल्या आंदोलनाची खरी सुरुवात आहे. हे आंदोलन इथेच थांबणार नाही तर ही लढाई वर्षानुवर्ष चालणारी आहे. यामुळे सर्वांनी एकजूट होऊन या शासनाची कबर खोदण्याची वेळ आली आहे.