रावणवाडी - मुलाचा अपघाती मृत्यू नाही, तर त्याचा खून करण्यात आला. तशी तक्रार पोलिसांत करूनही पोलिस कारवाई करीत नाही. त्यामुळे त्रस्त वासुदेव रामू तावाडे (वय ५५, रा. खातिया) हे गुरुवारी (ता. १४) पहाटे चारच्या सुमारास खातिया येथील मोबाईल टाॅवरवर चढले. रात्रभर ते टाॅवरवरच होते. जोपर्यंत न्याय मिळणार नाही, तोपर्यंत टाॅवरवरून उतरणार नसल्याची भूमिका त्यांनी घेतली. अखेर शुक्रवारी (ता. १५) सायंकाळी साडेपाचच्या सुमारास आश्वासनानंतर ते टाॅवरवरून खाली उतरले.

वासुदेव तावाडे यांचा मुलगा गोपाल याचा २०२१ मध्ये एका दुर्घटनेत मृत्यू झाला. त्याचा अपघाती मृत्यू झाल्याचे दर्शविण्यात आले. परंतु, अपघाती मृत्यू नसून, त्याला ठार मारण्यात आले, असा आरोप करीत वासुदेव तावाडे यांनी तशी तक्रार पोलिस ठाण्यात केली. परंतु, पोलिसांकडून व्यवस्थित तपास केला गेला नाही. आरोपी मोकाट फिरत आहेत. या घटनेची योग्य चाैकशी व्हावी, अशी विनवणी करूनही पोलिस कुठलीही कार्यवाही करीत नाही, असा आरोप तावाडे यांनी केला. एवढेच नव्हे, तर कर्जमाफी होऊनही नावावर कर्ज दाखविले जात आहे. यातही अन्याय झाला आहे, असा आरोपही त्यांचा आहे.

या सर्व प्रकरणांमध्ये प्रशासकीय यंत्रणा न्याय देत नसल्याने त्रस्त वासुदेव तावाडे यांनी गुरुवारी डाॅ. बाबासाहेब आंबेडकर यांच्या जयंतीदिनी गावातील मोबाईल टाॅवरवर चढून विरुगिरी केली. या घटनेची माहिती होताच पोलिस, फायर आणि आपत्ती व्यवस्थापनाची टीम घटनास्थळी दाखल झाली. पोलिसांनी त्यांना टाॅवरवरून उतरण्याची विनंती केली तरी, गुरुवारी रात्रभर टाॅवरवरून ते खाली उतरले नाही. त्यांनी रात्रभर टाॅवरवरच मुक्काम ठोकला. त्यांच्याकरिता अन्नपाणी त्यांचे नातेवाईक पोहोचवून देत होते. अखेर आज, शुक्रवारी सायंकाळी साडेपाचच्या सुमारास ते खाली उतरले.

तहसीलदारांचे आश्वासन

तहसीलदार पालांदूरकर यांनी वासुदेव तावाडे यांना दोन्ही समस्यांवर लवकरात लवकर तोडगा काढण्यात येईल, दोषींवर कारवाई करण्यात येईल, असे आश्वासन दिल्याने वासुदेव तावाडे यांनी टाॅवरवरून उतरण्याची भूमिका घेतली. अखेर सायंकाळी साडेपाचच्या सुमारास ते डाॅवरवरून खाली उतरले.