अहेरी (जि. गडचिराेली) : तालुक्यातील वेलगूर ग्रामपंचायतअंतर्गत येत असलेल्या नवेगाव गावात पती व पत्नीचा मृतदेह राहत्या घरात शुक्रवारी (ता. १८) आढळून आला आहे. जनार्दन लचमा कोटरंगे (वय ५०) व पोचूबाई जनार्दन कोटरंगे (वय ४७) असे मृतांचे नाव आहे. (The-bodies-of-the-couple-were-found-at-Navegaon-in-Gadchiroli)

गावकऱ्यांनी दिलेल्या माहितीनुसार, दोन्ही पती व पत्नी मजुरीचे काम करीत होते. जनार्दन यांनी पाच दिवसांपूर्वी गावकऱ्याकडून कामासाठी सायकल मागितली होती. मात्र, ती परत न केल्यामुळे सायकल मागण्यासाठी तो इसम गेला असता त्यांना शुक्रवारी सकाळी धक्कादायक दृश्य दिसले. दोन्ही पती व पत्नीचा मृतदेह राहत्या घरी दिसून आला. पतीचा मृतदेह फाट्याला लटकून होता तर पत्नीचा मृतदेह खाटेवर पडून असलेल्या अवस्थेत होता.

प्रत्यक्षदर्शी व्यक्तीने या घटनेची माहिती गावकऱ्यांना दिली. लागलीच मृताच्या मुलाला घटनेची माहिती दिली. मृताचा मुलगा त्याच्या सासरला कामानिमित्त गेला होता. घटनेची माहिती होताच तो गावी आला व अहेरी पोलिस स्टेशनला माहिती दिली. अहेरी पोलिसांनी घटनास्थळी पोहोचून घटनेचा पंचनामा केला. पोलिस तपासानंतरच घटनेची अधिक माहिती मिळणार, असे अहेरीचे पोलिस निरीक्षक डांगे यांनी सांगितले.

(The-bodies-of-the-couple-were-found-at-Navegaon-in-Gadchiroli)