शिंदोला (जि. यवतमाळ) : वणी येथे घरी आलेल्या पाहुण्यांना बल्लारशाह रेल्वे स्थानकावर सोडून परत येत असताना कारचा भीषण अपघात झाला. या अपघातात कारमधील समोरील दोन्ही एअर बॅग उघडल्याने दांपत्य सुदैवाने सुखरूप बचावले. हा अपघात नांदेपेरा मार्गावर नगराळे यांच्या दवाखान्यासमोर शनिवारी (ता. २४) पहाटे चार वाजतादरम्यान घडला.

येथील साई मंदिर चौकात मणीप्रभा टॉवर कॉम्पलेक्समधील रहिवासी आशीष झामड व त्यांची वहिनी आणि पुतण्याला रेल्वेत बसविण्यासाठी शुक्रवारी (ता. २३) रात्री १२ वाजता सियाझ कारने बल्लारशाहसाठी निघाले होते.

यावेळी आशीष यांच्या सोबत त्याची पत्नी अभिलाषा होती. वहिनीला बल्लारशाह येथे रेल्वेत बसवून झामड दांपत्य शनिवारी (ता. २४) रात्री तीन वाजता परत निघाले. पहाटे चार वाजतादरम्यान वणीपर्यंत ते सुखरूप आले.

मात्र आपल्या घरापासून अंदाजे १०० मीटर आधीच डॉ. नगराळे यांच्या दवाखान्यासमोर कारचालक आशीष झामड यांचे कारवरून नियंत्रण सुटले आणि कार दुसऱ्या बाजूला भाजी दुकानासमोर इलेक्ट्रिक खांबावर जाऊन धडकली. ही धडक इतकी जोरदार होती की सिमेंटचा खांब गाडीचा बोनट चिरून आत घुसला. धडक बसताच कारमधील दोन्ही एअर बॅग उघडल्या. त्यामुळे कारचालक आशीष आणि त्यांची पत्नीला फक्त किरकोळ इजा झाली. घटनेबाबत वणी पोलिसांना माहिती देण्यात आली आहे.