देऊळगावराजा (जि.बुलडाणा) : जालना जिल्ह्यातून चोरून आणलेल्या आठ लाख रुपये किमतीच्या कारचे नंबर प्लेट बदलून विकण्याच्या प्रयत्नात असलेला अट्टल कार चोरटा 26 जानेवारीला स्थानिक पोलिसांनी मोठ्या शिताफीने जेरबंद केले.

बुलडाणा तालुक्यातील करडी धाड येथील शेख नदीम शेख दाऊद (वय 23) असे सदर आरोपीचे नाव असून जालना जिल्ह्यातून आठ लाख रुपये किमतीचे स्विफ्ट डिझायर क्रमांक एम. एच. 21 ए एक्स 1645 कार चोरून त्यावर एम एच 22 सी 111 नंबरची बनावट प्लेट लावून शहरातील संजय नगर भागात संशयितरीत्या फिरत असल्याची गुप्त माहिती पोलिसांना मिळाली.

क्लिक करा - बापरे! महिला सफाई कामगार देतेय रुग्णांना इंजेक्शन

यांनी राबविले सर्चिंग ऑपरेशन
या माहितीच्या आधारावर सदर कारवाईबाबत पोलिस अधीक्षक डॉ. दिलीप भुजबळ पाटील व अप्पर पोलिस अधीक्षक डॉ. संदीप पखाले यांच्या सूचनेनुसार उपविभागीय पोलिस अधिकारी बी. एन. नलावडे, ठाणेदार संभाजी पाटील यांच्या मार्गदर्शनात पोलिस हेडकॉन्स्टेबल केशव मुळे, सर्जेराव तौर, पोलिस नाईक विजय किटे, तुळशीदास गुंजकर, नितीन जाधव, शिवाजी बिलगे, विजय गीते, गजानन भराड यांनी संजय नगर भागात सर्चिंग ऑपरेशन केले.

क्लिक करा - लोणार येथे पक्षीमित्र संमेलनाचे आयोजन

कार थांबताच काढला पळ
यावेळी बनावट नंबर प्लेट लावलेली स्विफ्ट डिझायर ही पांढऱ्या रंगाची कार समोरुन येताना दिसली. पोलिसांनी सदर कार थांबवून कार चालकास बाहेर येण्याचे सांगितले असता कार खाली उतरून त्याने पळ काढला. यावेळी पोलिस नाईक विजय किटे व तुळशीदास गुंजकर यांनी पाठलाग करून त्यास पकडले असता त्याने आपले नाव शेख नदीम शेख दाऊद सांगितले. सदर कार बाबत जालना जिल्ह्यातील चंदनझीरा पोलिस ठाण्यात गुन्हा दाखल असल्याचे सांगितले.

अनेक महागड्या कार चोरून विकल्याची माहिती
कार व चोरट्यास ताब्यात घेऊन पोलिसांनी तपास केला असता त्याने यापूर्वी अनेक महागड्या कार चोरून विकल्याची माहिती समोर आली. सदर कार विकण्यासाठीच तो देऊळगाव राजा परिसरात आला होता अशी माहिती पोलिसांनी दिली. पोलिसांनी याबाबत चंदनझीरा (जिल्हा जालना) पोलिसांशी संपर्क करून स्थानिक पोलिसांनी आरोपी व चोरून आणलेली कार एडीएस स्कॉटच्या ताब्यात दिले.