यवतमाळ : येथील पोलिस अधीक्षक कार्यालयात बॉक्‍समध्ये ठेवून असलेला चाबींचा गुच्छा गहाळ झाल्याची घटना शनिवारी (ता. पाच) सकाळी साडेसहा वाजता उघडकीस आली होती. या घटनेची गंभीर दखल घेत पोलिस कर्मचाऱ्यांचे बयाणही नोंदविण्यात आले. अखेर पोलिस उपअधीक्षक माधुरी बाविस्कर यांनी यवतमाळ शहर पोलिस ठाण्यात तक्रार दिली. त्यावरून अनोळखी व्यक्तीविरुद्घ गुन्हा नोंदविण्यात आला आहे.

पोलिस अधीक्षक कार्यालयात स्टेनो कक्ष, रिडर ब्रॅंच, मंथन हॉल, अभ्यागत कक्ष, अर्जशाखा, लेखाशाखा, आस्थापना शाखा, पत्रव्यवहार शाखा, जावक शाखा, सायबर सेल आदी कक्षांच्या चाब्या स्वागतकक्षाच्या जिन्याजवळ असलेल्या बॉक्‍समध्ये संबंधित विभागाचे कर्मचारी लावून ठेवतात. शिवाय अपर पोलिस अधीक्षक कक्ष, वाचक, स्थानिक गुन्हे शाखा, अर्ज शाखा, महिला सेल नक्षलसेल आदी शाखांचे कर्मचारी हे नियंत्रण कक्षात चाब्या ठेवतात.

अधिक वाचा - २४ वर्षांपूर्वी रेल्वेस्थानकावर सापडलेल्या 'वर्षा'चं गृहमंत्री अनिल देशमुख करणार कन्यादान

अगावूच्या चाब्या कर्मचाऱ्यांकडे असतात. एसपी कार्यालयाच्या सुरक्षेच्यादृष्टीने २४ तास सुरक्षारक्षकही तैनात असतात. शनिवारी सफाई कामगार पांडुरंग गवळी हे कार्यालयाच्या सफाईसाठी आले असता त्यांना बॉक्‍समध्ये एकही चाबी दिसली नाही. पोलिस अंमलदार दीपक गिरी यांना फोन करून विचारपूस केली. त्यांनी चाब्या शोधण्याचा सल्ला दिला. कर्तव्यावरील इतर कर्मचाऱ्यांना विचारणा केली. मात्र, चाब्या दिसल्या नाहीत.

गिरी यांच्याजवळ असलेल्या चाबींमुळे एसपींचा कक्ष, मंथन हॉल उघडण्यात आला. मात्र, इतर शाखेच्या चाब्या नसल्याने त्या शाखा बंदच होत्या. वाचक शाखा व सायबर सेलच्या प्रमुखांना चाब्या न मिळाल्याने कार्यालयाचे कुलूप तोडावे लागले. पोलिस अधीक्षक कार्यालयातूनच चाब्यांच्या गुच्छांची चोरी झाल्याने पोलिस दलात खळबळ उडाली आहे. पोलिस उपअधीक्षक बाविस्कर यांनी शहर पोलिस ठाण्यात दिलेल्या तक्रारीनुसार अनोळखी व्यक्तीविरुद्घ गुन्हा नोंदविण्यात आला आहे.

संपादन - नीलेश डाखोरे