पुसद (जि. यवतमाळ) : मराठवाड्यातील हिंगोली शहराजवळ असलेल्या आनंदनगर भागातील बनावट नोटांच्या प्रकरणाचा दहशतवादविरोधी पथकाने छडा लावल्यानंतर आता विदर्भातील पुसद येथून गुरुवारी (ता.४) पहाटे दोन जणांना अटक करण्यात आली. गेल्या तीन वर्षांपासून विदर्भातही बनावट नोटा चलनात आणल्याचे प्राथमिक चौकशीत निदर्शनास आले आहे. बनावट नोटा प्रकरणात आणखी काही मोठी मासे गळाला लागतील, असा पोलिसांचा कयास आहे.

हिंगोली शहरालगत आनंदनगर भागात बनावट नोटा छापणाऱ्या संशयित संतोष सूर्यवंशी-देशमुख व छाया भुक्तार या दोघांना अटक केल्यानंतर पोलिसांनी त्यांची अधिक चौकशी सुरू केली आहे. त्यांच्या चौकशीमध्ये पुसद येथील दोघे जण त्यांच्या सोबत काम करीत असल्याची माहिती पुढे आली.

अवश्य वाचा- ...अन् चालकाने घेतली धावत्या रुग्णवाहिकेतून उडी, नंतर घडला हा प्रकार...
 

हिंगोलीचे पोलिस अधीक्षक योगेशकुमार, अपर पोलिस अधीक्षक यशवंत काळे यांच्या मार्गदर्शनाखाली पोलिस उपअधीक्षक रामेश्‍वर वैंजने, सहायक पोलिस निरीक्षक ओमकांत चिंचोलकर, जमादार रूपेश धाबे, महेश बंडे, अर्जून पडघन, विजय घुगे यांच्या पथकाने बुधवारी (ता.३) मध्यरात्री पुसद येथे येऊन शोधमोहीम सुरू केली. त्यानंतर गुरुवारी पहाटेच्या सुमारास शेख इम्रान व विजय कुरुडे (दोन्ही रा. पुसद) यांना अटक केली. 

अवश्य वाचा- भिंत खचली, चूल विझली, आता डोळ्यांमध्ये पूर!

दरम्यान, वरील दोघेही संशयित संतोष सूर्यवंशी याच्या तीन वर्षापासून संपर्कात होते. तीन वर्षांपासून ते बनावट नोटा घेऊन विदर्भात चलनामध्ये आणत असल्याचे स्पष्ट झाले आहे. त्यामुळे त्यांनी पुसद येथे आणखी काही जणांना नोटा दिल्या काय, याची चौकशी पोलिसांनी सुरू केली आहे. तर यामध्ये आणखी काही जण सहभागी असून, त्यांच्या शोध घेण्यासाठी पोलिसांची चार पथके रवाना झाली आहेत. पुसद पोलिसांना मात्र, याची या पथकाने कुठलीही माहिती दिली नसल्याचे वसंतनगर पोलिस ठाण्याचे अधिकारी प्रदीप परदेशी यांनी 'सकाळ'ला सांगितले.

संपादन ः राजेंद्र मारोटकर