यवतमाळ : श्रीलंका विरुद्घ ऑस्ट्रेलिया या टि-20 विश्‍वचषक क्रिकेट सामन्यावर ऑनलाइन सट्टा खेळविणार्‍या तीन बुकींच्या मुसक्या सायबर सेलच्या पथकाने आवळल्या. कळंब येथील निरंजन माहूर रोडवर असलेल्या प्रवीण गुल्हाने यांच्या शेतातील घरात छापा टाकून गुरुवारी ही कारवाई केली.

रितेश फकीरचंद जोशी (वय 32,रा. बोरेले ले-आउट, यवतमाळ), सागर अनंत सव्वालाखे (वय 30, रा. नेहरू चौक), नितीन बाबुलाल वर्मा (वय 39, रा. दीपक चौक, अकोला), अशी बुकींची नावे आहे. यवतमाळ शहरात छापेमारी होत असल्याने कळंब येथील शेतात ऑनलाइन सट्टा सुरू असल्याची माहिती पोलिस अधीक्षकांना मिळाली. सायबर सेल व एलसीबीची पथके तयार करण्यात आली. पोलिसांनी छापा टाकला असता, जुगाराचा खेळ आढळून आला.

घटनास्थळावरून हॉटलाइन पोपट, सात मोबाइल, नऊ अ‍ॅण्ड्रॉईड मोबाइल, व्हाईस रेकॉर्डर, चारचाकी कार, रोख असा एकूण 13 लाख 86 हजार 910 रुपयांचा मुद्देमाल जप्त करण्यात आला. ही कारवाई पोलिस निरीक्षक दीपमाला भेंडे, सपोनि अमोल पुरी, पीएसआय भगवान पायघन यांच्यासह पथकाने केली.