वणी (जि. चंद्रपूर) : गुरुवारी सायंकाळी 6 वाजताच्या सुमारास तालुक्‍यातील डोर्ली शिवारात मन सुन्न करणारी घटना घडली. शेतातून घरी बैलबंडीतून परतणाऱ्यांवर काळाने झडप घातली. यात तिघांचा मृत्यू झाला तर दोन बैल दगावले असून डोर्ली गावात शोककळा पसरली आहे.

विनायक उपरे, हरिदास खाडे व मीना कुडमेथे अशी मृतकांची नावे आहेत. वणी तालुक्‍यातील डोर्ली शिवारात शेतातील कामे आटोपून शेतकरी-शेतमजूर बैलबंडीतून घरी परतत होते. तीन बैलबंड्यांमधून आठ व्यक्ती मार्गक्रमण करीत असताना रस्त्यात लागणारा नाला दुथडी भरून वाहत होता. पहिल्या बैलबंडीत असलेल्या दिपक विजय आडे (20) याने ओढ्यातून बैलगाडी व्यवस्थित बाहेर काढली. मात्र त्यांच्यामागे असलेली गाडी पाण्याच्या प्रवाहात उलटली.

यात विनायक उपरे (47), प्रशांत मनोहर सिडाम (30), संगीता विनायक उपरे (38), मीना मनोहर लडाम (55), मनिषा प्रशांत सिडाम (23), मीना मारुती कुडमेथे (35), या सहा व्यक्ती पाण्यात बुडाल्या. यातील चौघांनी आपला जीव वाचवला मात्र मीना कुडमेथे व विनायक उपरे यांना जलसमाधी मिळाली तर तिसऱ्या बैलगाडीतून हरिदास रामा खाडे (48) हे सुद्धा त्याचवेळी गाडीसह ओढ्यातील लोंढ्याने वाहून गेले.

घटनेची वार्ता वाऱ्यासारखी शिवारात पसरली. पोलिसांना पाचारण करण्यात आले. सायंकाळी शोधकार्य सुरू केले असता मीना कुडमेथे हिचा मृतदेह सापडला तर मनिषा प्रशांत सिडाम ही झाडाच्या फांदीला अडकल्याने सुखरूप बचावली. विनायक उपरे व हरिदास खाडे हे कालपासून बेपत्ता होते त्यांचा मृतदेह शुक्रवारी सकाळी अर्धा किमी अंतरावर आढळला.

सविस्तर वाचा - वा रे पठ्ठे...पाल टाकून उभारली विद्यार्थ्यांसाठी शाळा; आंतरराष्ट्रीय वृत्तपत्राने घेतली दखल, आता...

या घटनेची माहिती मिळताच आ. संजीवरेड्डी बोदकूरवार, उप विभागीय अधिकारी डॉ. शरद जावळे, तहसीलदार शाम धनमने, गटविकास अधिकारी राजेश गायनार, शिरपूरचे ठाणेदार अनिल राऊत हे तातडीने घटनास्थळी पोहोचले. या अनपेक्षित घटनेमुळे गावकरी हादरून गेले असून गावात शोककळा पसरली आहे.

संपादन - स्वाती हुद्दार