चिमूर (जि. चंद्रपूर) : चिमूर तालुक्‍यातील झरी-मांगरुड येथील गुलाब शेंडे व दिवाकर मारोती शेंडे या दोघाही भावांचे घर गतवर्षी पावसाळ्यात कोसळले. तोंडात घास पडण्यासाठी रोजच संघर्ष करावा लागणाऱ्या या शेंडे भावडांना घर बांधणे शक्‍यच नव्हते. दोघे भाऊ आणि गुलाबचा मुलगा दयाराम यांनी मग गावातील समाज मंदिरात संसार थाटला. मागील वर्षभरापासून ते "कुणी घर देता का घर ऽ ऽ ऽ' अशी आर्जव करीत आहेत. 

चिमूर पंचायत समिती अंतर्गत येणा-या "ताडोबा-अंधारी' व्याघ्र प्रकल्पालगत पाचशे लोकवस्तींचे "झरी-मांगरुड' हे गाव आहे. इथेच शेंडे परिवाराचे अनेक पिढ्यांपासून वास्तव्य आहे. दिवाकर मारोती शेंडे आणि गुलाब मारोती शेंडे हे दोन भाऊ. गुलाबचा मुलगा दयाराम आपल्या कुटुंबासह याच गावात राहतो. सारेच अल्पभूधारक. त्यामुळे दुसऱ्यांच्या शेतीवर मोलमजुरी करून कुटुंबाचा गाडा ते चालवितात. वडिलोपार्जित मोडकळीस आलेल्या घरात त्यांचे राहणे होते. मात्र गतवर्षी वादळी वाऱ्यासह आलेल्या मुसळधार पावसाने घर जमीनदोस्त झाले. 

सविस्तर वाचा - ता मुली देखील पॉर्न बघण्यात पुढे... नागपुरात तब्बल एवढे गुन्हे दाखल

घर जमीनदोस्त झाले आणि तेव्हापासून रस्त्यावर आलेले हे तीनही परिवार हवालदिल झाले. परंतु ते पुन्हा विटेवर वीट चढवू शकले नाहीत. त्यांच्यात एवढी ऐपतच नाही. तेव्हापासून या तिघांच्याही कुटुंबीयांनी गावातील समाज मंदीरात आसरा घेतला. नैसर्गिक आपत्तीमुळे पडलेल्या घराचे आणि झालेल्या नुकसानीचे सर्वेक्षण महसूल विभागाने केले. परंतु वर्षभराचा कालावधी लोटला. परंतु मदतीची एक दमडीही मिळाली नाही. ग्रामपंचायतमार्फत तिघांनीही घरकुलासाठी अर्ज सादर केले. मात्र याही योजनेचा लाभ त्यांना मिळालेला नाही. दारिद्रय रेषेखालील कुटुंबाला घरकुल योजनेचा लाभ मिळतो. परंतु संकटातील शेंडे कुटुंबीय या लाभापासूनही वंचित आहेत. 

अर्ज केला

आम्ही दारिद्य्र रेषेखालील जीवन जगत आहोत. घरकुलासाठी अर्ज केला आहे. परंतु अजून घरकुल मिळाले नाही. 
-गुलाब शेंडे आणि दिवाकर शेंडे 
झरी-मांगरुड, ता. चिमूर 

घरकुल मंजूर झाले नाही

गुलाब शेंडे, दिवाकर शेंडे आणि दयाराम शेंडे समाज मंदिरात राहतात. तिन्ही परिवार दारिद्रय रेषेखालील आहेत. चिमूर पंचायत समितीकडे ग्रामपंचायत मार्फत घरकुलासाठी अर्ज पाठवला. मात्र अद्याप त्यांचे घरकुल मंजूर झाले नाही. अधिकारी उडवाउडवीची उत्तरे देत आहेत. 
-वासुदेव बावणे 
उपसरपंच झरी-मांगरूड