घुग्घुस (जि. चंद्रपूर) : बंद पडलेल्या कोळसा खाणीत वाघाने मोराची शिकार केली. शनिवारी (ता. १९) जनावरे चराईसाठी घेऊन गेलेल्या गुराख्याच्या नजरेत हा प्रकार आला. या भागात वाघाचा वावर आहे. त्यामुळे या मार्गाने जाणाऱ्या कामगारांत भीतीचे वातावरण पसरले आहे. वनविभागाने वाघाचा बंदोबस्त करावा, अशी मागणी गावकऱ्यांनी केली आहे.

वणी क्षेत्रातील ही कोळसा खाण कित्येक वर्षांपासून बंद पडली आहे. या बंद कोळसा खाणीच्या परिसरात वृक्षारोपण करण्यात आले. त्यामुळे या भागात घनदाट जंगल तयार झाले आहे. याच भागात वन्यप्राण्यांचे वास्तव्य आहे. शनिवारी सकाळच्या सुमारास वर्धा नदीकाठावर बंद पडलेल्या या खाणीत गाई-म्हशी चरायला गेलेल्या काही नागरिकांना अगदी समोरच काही अंतरावर एक वाघ मोर खात असल्याचे दिसून आले.