सेलू (जि. वर्धा) : केळझर येथे बोरधरणाच्या मुख्य कालव्यात वाघीण मृतावस्थेत आढळून आली. ही घटना रविवारी सकाळी साडेनऊ वाजताच्या सुमारास उघडकीस आली. 

हेही वाचा - अख्खं गाव हळहळलं! पती-पत्नी पाठोपाठ मुलीचाही मृत्यू, एकाचवेळी निघाली तिघांची अंत्ययात्रा

केळझर येथे पिरबाबाच्या दर्ग्यानजीक आदिवासी जंगल कामगार संस्थेच्या शेताजवळ बोरधरणाचा मुख्य कालवा आहे. या कालव्यातून वाहत असलेल्या पाण्यात दीड वर्ष वयाची वाघीण मृतावस्थेत असल्याचे रस्त्याने जाणाऱ्यांना दिसले. ही माहिती गावात पोहोचताच घटनास्थळी बघ्यांनी गर्दी केली होती. ही माहिती वनपरिक्षेत्र अधिकारी रिता वैद्य, क्षेत्र सहायक दिनकर पाटील यांना कळताच त्यांनी घटनास्थळ गाठले. त्यांनी मृत वाघिणीला कालव्याबाहेर काढून काही घातपात झाला का म्हणून खात्री करून घेतली. मात्र, वाघिणीला कुठेही जखमा वा इतर निशाण दिसून आले नाही. तसेच तिचे सर्व अवयवही व्यवस्थित होते. 

हेही वाचा - आता १ नव्हे तर ४ वाजेपर्यंत सुरू राहणार दुकाने; सोमवारपासून होणार पुढील बदल

घटनास्थळी सहायक वनसंरक्षक, बोर व्याघ्र प्रकल्पाचे वनपरिक्षेत्र अधिकारी राठोड, वन्यजीव मित्र कौशल मिश्रा, संजय इंगळे, पोलिस उपनिरीक्षक नलावडे, वनविभागाचे अधिकारी, कर्मचारी मोक्‍यावर तळ ठोकून होते. शव विच्छेदनानंतर वाघिणीला अग्नी देण्यात आला. परिसरात वाघाचे वास्तव्य असल्याचे बोलले जात असून नागरिकांत दहशत निर्माण झाली आहे. 

वनविभागाच्या गस्तीचा अभाव - 
या भागात वन्यप्राण्यांची ये-जा असल्याने वनविभागाची गस्त असणे आवश्‍यक आहे. वाघीण मृतावस्थेत आढळलेल्या या भागालगत असलेल्या एका बंद कंपनीच्या आवारात याच कालव्यात काही महिन्यापूर्वी बिबट मृतावस्थेत आढळून आला होता. असे असतानाही वनविभागाकडून या भागात गस्त घालीत नसल्याने अशा घटना घडत असल्याचे सांगण्यात येत आहे.