सौंसर (जि. छिंदवाडा) : शनिवारी सकाळी झालेल्या जोरदार पावसामुळे रामाकोनानजीकच्या गहरानाल्याच्या पुलावरून पुराचे पाणी वाहत असल्याने नागपूर-छिंदवाडा मार्गावरील वाहतूक तब्बल तीन तास ठप्प झाली. दुपारी 12 वाजताच्या सुमारास सौंसर तालुक्‍यात जोरदार पावसाला सुरुवात झाली. यामुळे नदीनाले ओसंडून वाहू लागले. नागपूर-छिंदवाडा मार्गावरील रामाकोनानजीकच्या गहरानाल्याला एका वाजताच्या सुमारास पूर आला. पुलावरून पाणी वाहत असल्याने दुपारी 1 ते 2 वाजेपर्यंत वाहतूक ठप्प झाली. पूर ओसरल्यानंतर वाहतून सुरळीत झाली. मात्र अचानक तीन वाजेपासून पाण्याची पातळी वाढली व पुन्हा पुलावरून पाणी वाहू लागले. यामुळे तीन वाजेपासून पाच वाजेपर्यंत पुन्हा वाहतूक ठप्प झाली. लांबच लांब वाहनांच्या रांगा लागल्या. वाहनचालकांना आमला, रामपेठ असा प्रवास करून सौंसर येथे पोहचले.