पुसद (जि. यवतमाळ) : यवतमाळ जिल्ह्यातील शिक्षक असलेल्या दोन अनुभवी सायकलस्वारांनी हिमाचल प्रदेशमधील व जगातील सर्वांत उंच असलेल्या मनाली ते लेह व लेह ते खरदुंगला टॉप असा ५२५ किलोमीटरचा सायकल प्रवास सोमवारपासून (ता. ३०) सुरू केला आहे.

स्वातंत्र्याच्या अमृत महोत्सवानिमित्त यवतमाळ जिल्ह्यातील पुसद येथील कोषटवार दौलतखान विद्यालयातील सुपरिचित असलेले शारीरिक शिक्षक अनंत जाधव व दिग्रस पंचायत समितीतील चिंचोली क्रं. २ येथील जि. प. शिक्षक नितीन डहाके यांनी हिमाचल प्रदेशमधील व जगातील सर्वांत उंच असलेल्या मनाली ते लेह व लेह ते खरदुंगला टॉप असा ५२५ किलोमीटरचा सायकलने प्रवास करण्याचे ठरविले.

वर्धा सेवाग्राम येथून शनिवारी कुलू मनालीसाठी रेल्वेने प्रस्थान केले. सोमवारी पोहोचल्यानंतर त्यांनी सायकल प्रवासाला सुरुवात केली. जवळपास आठ ते दहा दिवसांत अतिशय खडतर असलेला ५२५ किमीचा प्रवास करून अमृत महोत्सवी वर्षाला आगळ्या वेगळ्या पद्धतीने अभिवादन करणार आहेत. दोघेही अनुभवी सायकलस्वार आहेत. यापूर्वीही त्यांनी खडतर असा सायकलचा प्रवास पार पाडला आहे.

अनंत जाधव यांनी यापूर्वी कोकण ट्रॅक्टर गुहागर ते गोवा ३७० किलोमीटरचा प्रवास केलेला आहे. तसेच बर्गामाऊंट या इवेंटमध्ये जगात दुसऱ्या क्रमांकावर १०० दिवसांत १,२८० किलोमीटर अंतर पूर्ण केले. अनंत जाधव यांनी आजपर्यंत एकूण सव्वीस हजार किलोमीटर सायकलिंग केले आहे. अनंत जाधव व नितीन डहाके यांच्या या प्रवासासाठी प्रा. डाॅ. शरद ठाकरे, प्रा. अजय राठोड व गुणवंतराव देशमुख विद्यालयातील शारीरिक शिक्षक अविनाश कराळे व मित्र मंडळाळाने शुभेच्छा दिल्या आहेत.