अमरावती : ग्रामीण भागात कवठाळ ते राजूरवाडी मार्गावर रस्त्याच्या कडेला उभ्या असलेल्या ट्रकचालकास आम्ही दादा आहोत. सर्व आम्हाला भितात, असे म्हणून जे जवळ असेल ते काढ, अशी धमकी दिली. ट्रकचालकाने नकार देताच हल्ला करून त्यांनी हजारोंचा ऐवज लुटला.

परवेश खान वल्द सामूर खान (वय 30, रा. पच्चटी, बिहार), असे लुटारुंच्या हल्ल्यात जखमी झालेल्या ट्रकचालकाचे नाव आहे. तो यवतमाळच्या एका मालवाहू कंपनीच्या वाहनावर चालक आहे. एमएच 40 वाय 8651 क्रमांकाचा ट्रकमध्ये सिमेटची पोती घेऊन तो 23 जुलै रोजी निघाला. मोर्शी ते राजूरवाडी मार्गावर त्याचे वाहन नादुरुस्त झाले. त्यामुळे ट्रक रस्त्याच्या कडेला उभा करून परवेश खान हा ट्रकच्या आत झोपला. कवठाळ ते राजूरवाडी मार्गावर 24 जुलैला रात्रीच्या सुमारास दुचाकीवरून आलेल्या दोघांनी आवाज देऊन उठविले.

वाचा - ब्रिटिशकालीन विश्रामगृहांचा ऐतिहासिक वारसा हळूहळू होतोय नष्ट!

दस्तऐवज तपासणीसाठी मागितले व ट्रकच्या खाली उतरविले. पैसे काढून दे, अन्यथा मारण्याची धमकी त्या लुटारुंनी दिली. त्या दोघांनी स्वत:ला आम्ही या परिसराचे दादा आहोत, लोक आम्हाला भितात, असे म्हणून नरेंद्र आठवले (रा. कवठाळ) व मिलन कोठे (रा. नांदुरा पिंगळाई), अशी ओळखी ट्रकचालकास करून दिली. त्यानंतर मारहाण करून तीन हजारांची रोकड जबरीने लुटून दुचाकीवरून पळ काढला. ट्रकचालक परवेश खान यांनी ट्रकमालकास घटनेची माहिती दिली, त्यानंतर शिरखेड पोलिस ठाण्यात लुटमारप्रकरणी तक्रार नोंदवली. पोलिसांनी संशयित आरोपी आठवले व कोठेविरुद्ध लुटमार, जीवे मारण्याची धमकी दिल्याप्रकरणी गुन्हा दाखल केला.

न्यायालयाने गुन्हा दाखल झालेल्या दोघांना बुधवारपर्यंत पोलिस कोठडीत ठेवण्याचे आदेश दिले. लुटलेला ऐवज, गुन्ह्यातील दुचाकी जप्त झाली.
केशव ठाकरे, पोलिस निरीक्षक, शिरखेड.  

संपादन - नरेश शेळके