जामली (जि. अमरावती) - चिखलदरा तालुक्यातील बागलिंगा येथे एकाच घरातील सख्ख्या बहीण-भावाचा मृत्यू झाल्याने एकच खळबळ उडाली आहे. दिवसभर खेळल्यानंतर संध्याकाळी सात वाजता दोन्ही मुलांनी घरातील पाणी प्यायल्याने भोवळ आली व मृत्यू झाला, असे घरातील आई-वडिलांचे म्हणणे आहे.

टेम्ब्रुसोंडा आरोग्यकेंद्रांतर्गत येत असलेल्या बागलिंगा गावातील रुद्राक्ष राजेश मावस्कर (वय अडीच वर्ष) व गायत्री राजेश मावस्कर (वय ५ वर्षे) असे मृत्यू झालेल्या बालकांची नावे आहेत. राजेश मावस्कर हे उन्हाळ्यात मुंबई येथे मुलाबाळांसह कामावर होते. सोमवारी (ता. तीन) संध्याकाळपर्यंत घरी बागलिंगा येथे पोहोचले. दिवसभर दोन्ही मुले घरात व अंगणात खेळत होती.

संध्याकाळी आई-वडिलांनी आवाज दिल्यावर ती दोन्ही मुले घरात आली. दोघेही पाणी पिलेत. अर्ध्या तासानंतर दोघांना भोवळ आली. जमिनीवर पडले असता मुलांचे डोळे पांढरे झाले. काही कुणाला सांगण्याच्या अगोदरच दोन्ही मुलांनी क्षणार्धातच आपले डोळे मिटले, असे घरच्यांनी सांगितले.

वैद्यकीय अधिकाऱ्यांची बागलिंगा गावाला भेट

दोन्ही बालकांच्या मृत्यूची बातमी समजताच त्या घराला भेट दिली. घरच्यांनी सांगितले की, दोन्ही मुले धरणाच्या पाण्यात अंघोळीला गेली होती. त्यावेळी त्यांना साप चावला किंवा उन्ह लागल्याचा अंदाज आहे. त्या मुलांचे आईवडील खरे बोलण्यास तयार नाहीत. त्यांनी मुलांना पण पाहू दिले नाही, असे टेम्ब्रुसोंडा येथील वैद्यकीय अधिकारी तथा प्रभारी तालुका आरोग्य अधिकारी डॉ. चंदन पिंपळकर यांनी सांगितले.