गोंदिया : स्क्रब टायफसने जिल्ह्यातील दोघांचा मृत्यू झाल्याची शंका व्यक्त करण्यात येत आहे. यातील विनोद साधू राऊत (वय 45) हा नवेगावबांध येथील माहुली मोहल्ल्यातील तर, सुनील ओमप्रकाश लोथे (वय 19) सडक अर्जुनी तालुक्‍यातील राका येथे राहणारा आहे.
प्रतिनिधींनी दिलेल्या माहितीनुसार, येथील ग्रामीण रुग्णालयात 17 सप्टेंबरपासून विनोद राऊत उपचार घेत होते. स्क्रब टायफसचा रुग्ण असल्याचा संशय डॉक्‍टरांना आल्याने त्यांना गोंदिया येथील शासकीय वैद्यकीय महाविद्यालयात पाठविले. परंतु, त्यांना कुटुंबीयांनी गोंदिया येथे न नेता सानगडी येथील एका भोंदूबाबाकडे नेले. आज, बुधवारी सकाळी त्यांचा मृत्यू झाला. विनोद 10-12 दिवसांपासून ताप व डोके दुखीने आजारी होते. त्यांनी खासगी डॉक्‍टरांकडे उपचार घेतला. परंतु, आजार बरा झाला नाही.
सुनील लोथे या तरुणाची दोन दिवसांपासून प्रकृती बरी नव्हती. त्याला गावातील खासगी रुग्णालय तसेच सौंदड येथील ग्रामीण रुग्णालयात दाखल करण्यात आले होते. मात्र, हगवण आणि उलटीचा त्रास कमी न झाल्याने त्याला आज, बुधवारी सकाळी गोंडउमरी येथील खासगी रुग्णालयात नेत असताना वाटेत मृत्यू झाला. स्क्रब टायफसने त्याचा मृत्यू झाला असावा, अशी शंका व्यक्त करण्यात येत आहे.