वणी (जि. यवतमाळ) : तालुक्‍यातील कुंभारखणी भूमिगत कोळसा खाणीत गुरुवारी (ता. 18) सायंकाळी दोघांचा गुदमरून मृत्यू झाला. मृतांमध्ये वेकोलि कर्मचारी गुड्डू रामेश्‍वर सिंह व त्यांचा भाचा राजकुमार महेंद्र सिंह यांचा समावेश आहे. या घटनेत दोन कर्मचारी गंभीर झाले आहेत.
वणी उत्तर क्षेत्रात "वेकोलि'च्या 13 कोळसा खाणी आहेत. त्यातील कुंभारखणी व भांदेवाडा येथे भूमिगत कोळसा खाणी आहेत. कुंभारखणी भूमिगत कोळसा खाण गेल्या 2000 मध्ये सुरू करण्यात आली. त्यातील कोळसा संपल्याने "वेकोलि'च्या प्रशासनाने मागील वर्षीपासून ही खाण बंद करण्याचा निर्णय घेतला. त्यानुसार सदर खाण बंद करण्याचे काम सुरू आहे. सुटीवर असलेले गुड्डू सिंह गुरुवारी कामावर परतले. यावेळी सोबत असलेला भाचा राजकुमारने आग्रह केल्याने दोघेही खाणीच्या आत गेले. दरम्यान, अचानक गॅस लीक झाल्याने दोघांचाही गुदमरून मृत्यू झाला. कुंभारखणी "वेकोलि' वसाहतीत राहणारे कर्मचारी बंडू ठेंगणे (वय 55) व महादेव तेलंग (वय 59) हे दोघेही खाण बंद करण्याचे काम करीत असल्याने गॅस लीकची झळ त्यांनाही पोहोचली. त्यांना लगेच उपचारासाठी वणी येथील खासगी रुग्णालयात दाखल करण्यात आले. माहिती मिळताच वणीचे ठाणेदार वैभव जाधव यांनी घटनास्थळी पोलिस पथक रवाना केले.