मूल (जि. चंद्रपूर) : सध्या शेतीचा हंगाम सुरू आहे. यामुळे शेतकरी व मजूर शेतात व्यस्त असतात. पावसाळ्यात शेतीचे काम वेग घेत असते. मात्र, याच पावसात अनेकांना आपला जीवही गमवावा लागतो. गुरुवारी (ता. १) वादळी वाऱ्यासह आलेल्या पावसात अंगावर वीज कोसळल्याने दोघांचा जीव गेल्याची घटना चंद्रपूर जिल्‍ह्यातील मूल (Two farmers killed) तालुक्यात घडली. विलास केशव नागापुरे (५०) आणि गयाबाई नामदेव पोरटे (६०) असे मृतांचे नाव आहे. या दुर्दैवी घटनेनंतर गावात हळहळ व्यक्त करण्यात येत आहे. (Two-farmers-killed-in-power-outage)

मूल तालुक्यात धानाची पेरणी आटोपली जात आहे. शेतात पऱ्हाटी आणि तूर लावण्यासाठी बोंडाळा खुर्द येथील रहिवासी विलास नागापुरे व गयाबाई पोरटे हे सकाळीच शेतात गेले होते. दोघांचेही शेत एकमेकांच्या शेताजवळच आहे. दुपारच्या सुमारास अचानक वादळी वाऱ्यासह जोरदार पावसाला सुरुवात झाली. जोर जोऱ्यात पाऊस येत असल्याने चौघांनी शेतातील कडुनिंबाच्या झाडाखाली आश्रय घेतला. हीच चूक त्यांना भोवली.

चौघे जण झाडाखाली असताना वीज कोसळली. अंगावर वीज कोसळल्याने विलास नागापुरे व गयाबाई पोरटे यांचा भाजून मृत्यू झाला. तर ताराबाई विलास नागापुरे व नामदेव तानू पोरटे हे गंभीर जखमी झाले. तसेच झाडाखाली असलेल्या दोन बकऱ्यांचासुद्धा यात मृत्यू झाला. दोन्ही बकरे विलास नागापुरे यांची असल्याची महिती आहे.

गावात हळहळ

वीज कोसळून दोघांचा मृत्यू झाल्याची माहिती मिळताच बेंबाळ पोलिस ठाण्याचे चौकीदार, पोलिस उपनिरीक्षक, मूल येथील नायब तहसीलदार आणि बोडाळा खुर्दचे सरपंच यांनी घटनास्थळी भेट देऊन पंचनामा केला. या घटनेत गंभीर जखमी झालेले ताराबाई व नामदेव यांना मूल येथील उपजिल्हा रुग्णालयात दाखल करण्यात आले आहे. मृतांवर उपजिल्हा रुग्णालयात शवविच्छेदन करण्यात आले. बोंडाळा खुर्द येथे हळहळ आणि शोक व्यक्त केला जात आहे.

(Two-farmers-killed-in-power-outage)