अमरावती : कर्ज काढून घेतलेली जेसीबी मशीन विक्रीच्या व्यवहारात आठ लाखांनी फसवणूक झाली. चांदूररेल्वे पोलिसांनी याप्रकरणी यवतमाळ व नागपूरच्या दोघांविरुद्ध फसवणूक, विश्‍वासघात प्रकरणी गुन्हा दाखल केला.

शेषराज बाबूसिंग राठोड (वय २४, रा. बानगाव, जि. यवतमाळ) व अल्बर्ट युबर्ट (रा. जरीपटका, जि. नागपूर), अशी फसवणुकीचा गुन्हा दाखल झालेल्या दोघांची नावे आहेत. दिलीप रामाजी चामलाटे (वय ५५, रा. वरुड) यांनी २०१९ मध्ये जेसीबी मशीन विकत घेतली. त्यासाठी एका फायनान्स कंपनीकडून कर्ज घेतले होते. त्यानंतर ३० ऑक्‍टोबर २०१९ रोजी हीच जेसीबी यवतमाळ जिल्ह्याच्या राठोड यांना विकली. विक्रीचा व्यवहार स्टॅम्पपेपरवर नोटरी करून झाला. व्यवहार करतेवेळी तीन लाख वीस हजार एवढी रक्कम चामलाटे यांना दिली.

वाचा - कोरोनाबाधित मृतदेहाच्या अवयवांची होतेय तस्करी! उच्च न्यायालयात मध्यस्थी अर्ज, केली ही मागणी

उर्वरित थकीत असलेले फायनान्स कंपनीचे कर्ज आठ लाख रुपयांचे हे राठोड व त्याच्या साथीदाराने भरायचे होते. राठोड यांनी जेसीबी घेतल्यानंतर आठ महिन्यांपासून थकीत कर्जाचे हप्ते भरले नाही. पूर्वीचे कर्ज चामलाटे यांच्या नावाने असल्याने फायनान्स कंपनीने त्यांच्याच मागे थकीत कर्जासाठी तगादा लावला. त्यानंतर ४ ऑक्‍टोबर २०२० रोजी राठोड व अल्बर्ट यांनी अमरावतीत येऊन एका कारमध्ये बसविले. कोऱ्या स्टॅम्पपेपरवर स्वाक्षरी घेऊन राठोड यांना मध्येच उतरून दिले, असा आरोपही त्यांनी तक्रारीत केला. राठोडसह त्याचा साथीदार अल्बर्ट युबर्ट या दोघांनी जेसीबी विक्रीच्या व्यवहारात आर्थिक फसवणूक केली, असे तक्रारीत सांगितल्या गेले. जेसीबी मशीन ही मालखेड, चांदूररेल्वे येथे नेऊन ठेवली. त्यामुळे चांदूररेल्वे ठाण्यात तक्रार नोंदविल्याने गुन्हा दाखल झाला.

संपादन - नरेश शेळके