नागपूर : महाराष्ट्रात घडलेल्या सत्तांतर नाट्यानंतर भाजपचे राष्ट्रीय अध्यक्ष तसेच केंद्रीय गृहमंत्री अमित शहा गुरुवारी प्रथमच नागपूरला येत आहेत. दोन दिवसांच्या दौऱ्यात ते केंद्रीयमंत्री नितीन गडकरी यांच्याशी खास बातचीत करणार असल्याचे समजते. त्यामुळे शहा यांच्या दौऱ्याकडे भाजपच्या पदाधिकाऱ्यांचे लक्ष लागले आहे. 

राज्यातील सत्तास्थापनेदरम्यान घडलेल्या घडामोडींवर अमित शहा यांनी अनेक दिवस मौन पाळले होते. केंद्रातील बड्या नेत्यांनी शिवसेनेची मनधरणी करण्यास पुढाकार घेतला नाही तसेच हातचे राखून हस्तक्षेप केला. शिवसेनेला मुख्यमंत्रिपद देण्याचा शब्द दिला होता की नाही याचाही अद्याप खुलासा कोणी केला नाही. फक्त देवेंद्र फडणवीस हेच मुख्यमंत्री होतील, असे प्रचारसभांमधून सांगण्यात येत होते तेव्हा शिवसेनेने आक्षेप का घेतला नाही, अशी विचारणा करून अमित शहा यांनी या वादतून अंग काढून घेतले होते. 

अधिक माहितीसाठी - आता चिअर्सला नों लिमिट, या अल्कोहलचा लागला शोध

या घडामोडी घडत असताना नितीन गडकरी हेसुद्धा नागपूर आणि मुंबईत होते. महाराष्ट्रात भाजपचीच सत्ता येईल असेच ते सांगत होते. या दरम्यान देवेंद्र फडणवीस यांनी अजित पवार यांना सोबत घेऊन सत्ता स्थापनेचा प्रयोगही केला होता. मात्र तो फसला. त्यानंतर शिवसेना, कॉंग्रेस आणि राष्ट्रवादी कॉंग्रेसने महाआघाडी स्थापन करून राज्यात सत्तास्थापन केली आहे. देशातील महत्त्वाचे राज्य गमावल्यानंतर अमित शहा प्रथमच नागपूरला येत आहेत. नॅशनल सर्व्हिस फायर कॉलेजच्या नव्या कॅम्पसचे उद्‌घाटन शहा यांच्या हस्ते होणार आहे. 

हा सोहळा गुरुवारी होणार असून शहा दिवसभर मुक्कामी राहणार आहेत. ते दुसऱ्या दिवशी शुक्रवारी (ता. 3) दिल्लीला जाणार आहेत. या दरम्यान नितीन गडकरी यांच्याशी राज्यातील राजकीय घडामोडींवर बातचीत करणार असल्याचे समजते. नव्या वर्षात नागपूरकरांना सदर येथील उड्डाणपुलाची भेट केंद्र सरकारकडून मिळणार आहे. या पुलासोबतच नॅशनल फायर सर्व्हिस कॉलेजच्या इमारतीचे लोकार्पण केंद्रीय गृहमंत्री अमित शहा यांच्या हस्ते होईल.