पुसद (जि. यवतमाळ) : इच्छाशक्ती आणि प्रयत्न असेल, तर गरिबी ध्येयाच्या आड येऊ शकत नाही. तालुक्‍यातील उडदी येथील वैशाली नारायण डाखोरे या विवाहित महिलेने गरिबीला छेद देत महाराष्ट्र लोकसेवा आयोगाच्या परीक्षेत यशस्वी झेप घेतली. तिने कर सहायक व मंत्रालय लिपिक या दोन्ही परीक्षा उत्तीर्ण केल्या आहेत. तिच्या या यशाचे कौतुक होत आहे.
वैशालीचे प्राथमिक शिक्षण महागाव तालुक्‍यातील हिवरा खुर्द येथे झाले. तिचे लग्न पुसद आगारातील वाहक नारायण डाखोरे यांच्याशी 2014 मध्ये झाले. याचवेळी तिने पदवी परीक्षा उत्तीर्ण केली. घरची परिस्थिती हलाखीची असल्याने तिने स्पर्धा परीक्षेसाठी उडदी येथेच तयारी चालवली. घरसंसार सांभाळून नियमितपणे अभ्यास केला. महाराष्ट्र लोकसेवा आयोगाची कर सहायक व मंत्रालय लिपिक या दोन्ही परीक्षा पहिल्याच प्रयत्नात उत्तीर्ण केल्या. आपल्या यशाचे श्रेय तिने आई-वडील, सासू-सासरे, पती आणि शिक्षकमित्राला दिले.

यशाच्या आड गरिबी येऊ शकत नाही. अभ्यास आणि प्रयत्नांची पराकाष्ठा यातून यशोशिखर गाठता येते. स्पर्धा परीक्षेच्या तयारीसाठी माझे पती नारायण यांनी मला प्रोत्साहन दिले.
-वैशाली नारायण डाखोरे, उडदी, ता. पुसद.