नागपूर : मुख्यमंत्री देवेन्द्र फडणवीस, अर्थमंत्री सुधीर मुनगंटीवार, विरोधी पक्ष नेते विजय वडेट्टीवार यांच्यासह विदर्भातील 755 उमेदवारांचे भाग्य आज सोमवारी मतयंत्रात "सीलबंद' झाले. विदर्भात असलेल्या 62 मतदारसंघातील 59 टक्के मतदारांनी आज त्यांचा आमदार निवडण्यासाठी मतदान केले. गुरुवारी होणाऱ्या मतमोजणीतच त्यांच्या भाग्याचा फैसला होईल. आजचे मतदान सर्वत्र शांततेत पार पडले असले तरी शेंदूरजना घाट (जि. अमरावती) येथे आघाडीच्या उमेदवाराचे वाहन जाळल्याच्या घटनेचे एक गालबोट मतदानाला लागले. तर आघाडीचा एक उमेदवार मतदानपूर्व मध्यरात्री पैशांच्या पाकिटासह पोलिसांना आढळून आल्याने एकच खळबळ उडाली.
निवडणूक आयोगाच्या वेबसाईटवर रात्री 8.30 वाजता असलेल्या मतदानाच्या सरासरी आकडेवारीनुसार विदर्भातील अकरा जिल्ह्यात मिळून एकूण 59.11 टक्के मतदान झाले आहे. त्यात सर्वाधिक 67.33 टक्के मतदान भंडारा जिल्ह्यात झाले. मतदारसंघनिहाय टक्केवारीचा विचार केला असता भंडारा जिल्ह्यातील तुमसर मतदारसंघात सरासरी 70 टक्के मतदान झाले आहे. आयोगाच्या वेबसाईटवरील मतदानाच्या आकडेवारीत बुलढाणा जिल्ह्याची आकडेवारी दिलेली नाही. परंतु प्राप्त माहितीनुसार या जिल्ह्यात 60 टक्के मतदान झाले आहे. अंतिम आकडेवारी अजून जाहीर व्हायची आहे.
मतदान सुरू झाल्यानंतर ईव्हीएम मशीनमध्ये व व्हीव्हीपॅटमध्ये बिघाड झाल्याच्या घटना अनेक ठिकाणी झाल्यात. तेथे काही काळ मतदान थांबली. आयोगाने तातडीने त्याठिकाणी नवीन मशीन पोहचवल्या व मतदान परत सुरू झाले.
आज सरसंघचालक डॉ. मोहन भागवत, सरकार्यवाह भैयाजी जोशी, डॉ. अभय व डॉ. राणी बंग, डॉ. विकास आमटे, डॉ. प्रकाश आमटे, डॉ. रवीन्द्र व स्मिता कोल्हे, शंकरबाबा पापळकर, "करोड'पती बेबीताई ताटे या मान्यवरांनी मतदान केले.
मोर्शी (जि. अमरावती) मतदारसंघातील महाआघाडी समर्थित स्वाभिमान शेतकरी संघटनेचे उमेदवार देवेंद्र भुयार यांच्यावर काही अज्ञातांनी प्राणघातक हल्ला चढवून त्यांची गाडी जाळली. त्यांच्या गाडीवर गोळ्या झाडल्याचेही सांगण्यात येत आहे. भुयार यांना उपचारासाठी रुग्णालयात दाखल केले आहे. या घटनेमुळे काही काळ शेंदुरजना पोलिस ठाण्यासमोर गोंधळही झाला. नागपुरात पश्‍चिम नागपूर मतदारसंघातील कॉंग्रेसचे उमेदवार विकास ठाकरे व राष्ट्रवादीचे आमदार प्रकाश गजभिये हे एक लाखाच्या रकमेसह काल मध्यरात्री पोलिसांना आढळून आले. त्यामुळए राजकीय वर्तुळात एकच खळबळ उडाली होती.

दोन कर्मचाऱ्यांचा मृत्यू
एटापल्ली (जि. गडचिरोली) तालुक्‍यातील जि. प. प्राथमिक शाळेचे शिक्षक बापू पांडु गावडे (वय 45) यांचा निवडणूक कर्तव्यावर असताना मृत्यू झाला. त्यांची अहेरी मतदारसंघातील पुरसलगोंदी येथील बुथवर ड्यूटी लागली होती. ते पुरसलगोंदीकडे पायी जात असतांना गावडे हे भोवळ येऊन पडले. त्यांच्या डोक्‍याला गंभीर मार लागला. उपचारादरम्यान त्यांचा मृत्यू झाला. दुसरी घटना चामोर्शी येथील बुध क्र. 207 वर कार्यरत कर्मचारी विजय गजानन खंडाळे (45) यांना हृदयविकाराचा झटका आल्याने त्यांचा मृत्यू झाला.