घुग्घुस (जि. चंद्रपूर ) :   घुग्घुस नगर परिषदेची अधिसूचना जाहीर झाल्यानंतर ग्रामपंचायत निवडणुकीचा कार्यक्रम आता जाहीर झाला आहे. त्यामुळे पालिकेसाठी घुग्घुसवासी आक्रमक झाले आहेत. आज सोमवारला सर्वपक्षीय नेत्यांनी चक्काजाम आंदोलन केले. 

हेही वाचा - अख्ख नागपूर टेंशनमध्ये! महिनाभरात १८० जण विदेशातून परतले, फक्त ५० जणांचा लागला शोध

घुग्घुस नगरपरिषदेची पहिली अधिसूचना 31 ऑगस्टला जाहीर झाली. राज्यातील मुदत संपलेल्या चौदा हजार ग्रामपंचायत आणि  चंद्रपूर तालुक्‍यातील 38 ग्रामपंचायतच्या निवडणुका 15 जानेवारीला होऊ घातल्या आहेत. यात घुग्घुस ग्रामपंचायतचाही समावेश आहे. 23 डिसेंबरला ग्रामपंचायत कार्यालयात सर्वपक्षीय बैठक घेण्यात आली. यात ग्रामपंचायत निवडणुकीवर बहिष्कार घालण्याचा निर्णय घेण्यात आला. 23 ते 30 डिसेंबरपर्यंत नामांकन दाखल करण्यात येणार आहे. अद्यापही घुग्घुस ग्रामपंचायतसाठी एकही नामांकन आलेले नाही. 

हेही वाचा - देशाची वाटचाल हुकमशाहीकडे; राज्याचे मंत्री विजय वडेट्टीवार यांची केंद्र सरकारवर टीका 

दरम्यान, तहसीलदार नीलेश गौड यांनी सर्वपक्षीय नेत्यांची समजूत काढण्याचा प्रयत्न केला. परंतु, ते आपल्या भूमिकेवर ठाम राहिले. त्यामुळे तोडगा निघू शकला नाही. उलट नेते पालिकेच्या मागणीला घेऊन आणखी आक्रमक झाले. शासनाचे लक्ष वेधण्यासाठी 28 डिसेंबरला घुग्घुस येथील बस स्थानक परिसरात चक्का जाम करण्यात आले. त्यामुळे बराच काळ या परिसरातील वाहतूक खोळंबली होती. पोलिसांचा तगडा बंदोबस्त होता. दंगा नियंत्रण पथक तैनात होते. आंदोलकांना पोलिसांनी ताब्यात घेतले आणि त्यानंतर सोडून देण्यात आले.