अमरावती: शहरातील नागपुरी गेट पोलिस ठाण्यावर शुक्रवारी (ता. चार) रात्री जमलेल्या जमावाने केलेल्या दगडफेकीत पोलिस अधिकारी व कर्मचारी, असे २१ जण जखमी झाले.

जमावाने पोलिसांच्या दहा वाहनांची तोडफोड केली. त्यात काही दुचाकींचा सुद्धा समावेश आहे. शनिवारी (ता. पाच) परिसरात जमावबंदी लागू करण्यात आल्याने तणावपूर्ण शांतता होती.

उत्तर प्रदेशातील गाझियाबादस्थित दासनादेवी मंदिराचे विश्वस्त नरसिंह आनंद सरस्वती यांच्या विरुद्ध गुन्हा दाखल करण्याच्या मागणीसाठी शुक्रवारी रात्री नागपुरी गेट ठाण्यावर काही जण पोहोचले.

जमावातील काही लोकांनी अचानक दगडफेक केल्याने वातावरण चिघळले. परिस्थिती नियंत्रणात आणण्यासाठी पोलिसांनी लाठीहल्ला केला. अश्रुधुराच्या नळकांड्याही फोडल्या. त्यानंतर जमावातील मुख्य २६ जणांसह हजार ते बाराशेच्या आसपास लोकांविरुद्ध गुन्हे दाखल करण्यात आले, असे नागपुरीगेटचे ठाणेदार हनमंत उरलागोंडावार यांनी सांगितले.

जखमींमध्ये एसआरपीएफ अमरावती शहर पोलिस, क्यूआरटी पथक, होमगार्ड जवानांचाही समावेश आहे. जखमींना तातडीने रात्रीच उपचारासाठी जिल्हा सामान्य रुग्णालयात दाखल करण्यात आले होते.

परिसरात शुक्रवारी रात्री आणि शनिवारी दिवसभर अतिरिक्त कुमक तैनात करण्यात आली असून काही भागांत फिक्स पॉइंट लावण्यात आले आहेत.

जमावबंदीचे आदेश

पोलिस ठाण्यावर व वाहनांवर झालेल्या दगडफेकीमध्ये जवळपास पाच ते सहा लाखांच्या आसपास नुकसान झाले आहे. जमावबंदीचे आदेश लागू असून, परिसरात शांतता आहे. ज्यांच्याविरुद्ध जमावाचा आक्षेप होता त्यांच्याविरुद्ध एफआयआर नोंदविण्यात आला आहे, असे ठाणेदार हनमंत उरलागोंडावार यांनी सांगितले.