सालेकसा (जि. गोंदिया) : नक्षलग्रस्त, आदिवासीबहुल सालेकसा तालुक्‍यात अजूनही विकासाची गंगा पोहोचली नसल्याचे दिसून येते. गेल्या ४० वर्षांपासून बोदलबोडीजवळच्या बाघ नदीवर पुलाचे बांधकाम झाले नाही.

त्यामुळे बोदलबोडी व परिसरातील नागरिकांना अंजोरा, आमगाव हे सात किलोमीटरचे अंतर गाठण्यासाठी १५ किलोमीटरचा फेरा गाठावा लागत आहे. हा फेरा गाठण्यात नागरिकांचा श्रम व पैसा खर्च होत आहे.

बोदलबोडी मार्गावर वाहतूक अधिक असल्याने बोदलबोडी ते भजेपार मार्गावरील बाघ नदीवर पुलाचे बांधकाम करण्यात यावे, अशी मागणी कित्येक वर्षांपासून परिसरातील नागरिकांनी केली होती. मागे याच मागणीला घेऊन दरवर्षी परिसरातील लोकप्रतिनिधी पूल बांधकामाचे आश्‍वासन देत होते. मात्र, त्यांचे आश्‍वासन अजूनही हवेत विरले आहे.

रस्ता झाला बंद

विशेष म्हणजे, बोदलबोडी या गावाचे प्राथमिक आरोग्य केंद्र सातगाव येथे असल्याने नागरिकांना शासकीय आरोग्य सेवेचा लाभ घेता येत नाही. भजेपार मार्गावर गेल्या ४ महिन्यांपूर्वी पावसाचे पाणी साचले होते. त्यामुळे रस्त्याची दुरवस्था झाली असून, आवागमनासाठी हा रस्ता सध्या बंद आहे.

अवश्य वाचा : गर्भवतीच्या मृत्यूनंतर होणार वाळू तस्करीचा तपास; आमदारच म्हणतात, तस्करांना नेत्यांचे अभय

पुलाचे बांधकाम त्वरित करा

बोदलबोडीपासून ७ किलोमीटर अंतरावर अंजोरा, आमगाव आहे. परंतु, येथे पूल नसल्याने परिसरातील नागरिकांना हे गाव गाठण्यासाठी १५ किलोमीटर अधिक अंतर गाठावे लागत आहे. दरम्यान, संबंधित लोकप्रतिनिधी व बांधकाम विभागाने लक्ष देऊन बोदलबोडी-भजेपार पुलाचे त्वरित बांधकाम करावे, अशी मागणी होत आहे.

जाणून घ्या : बेपत्ता 'वीर' 12 तासांत आढळला; घुग्घुस ते नागपूर प्रवासाचे गूढ गुलदस्त्यात

लोकप्रतिनिधींनी लक्ष द्यावे
बोदलबोडी-भजेपार मार्गावरील बाघ नदी पुलाचे टेंडर झाले नाही. फाइल मंत्रालयात पडून आहे. लोकप्रतिनिधींनी लक्ष दिले तर, काम सुरू होण्यास विलंब लागणार नाही.
- टी. एस. तुरकर, उपविभागीय अभियंता, सार्वजनिक बांधकाम विभाग, गोंदिया.

(संपादन :  दुलिराम रहांगडाले)