वरठी (जि. भंडारा) : कोरोनाचा संसर्ग थांबविण्यासाठी सरकारने लॉकडाउन घोषित केले. तेव्हापासून आजतागायत चहाच्या टपऱ्यांना कुलूप आहे. दरम्यान, शिथिलता मिळताच बाजारपेठ खुली झाली. जीवनावश्‍यक वस्तूंशिवाय इतर दुकाने सुरू झाली. दारूची दुकानेही उघडली. मात्र, चहाची दुकाने अद्याप टाळेबंद आहेत. तब्बल दोन महिन्यांपासून रोजगाराचे साधन हिरावल्याने नागरिकांना चहाचा घोट देणाऱ्या विक्रेत्यांवर विषाचा घोट घेण्याची वेळ आली आहे. "चाय पे चर्चा' करणाऱ्या पंतप्रधान नरेंद्र मोदी यांनी आमची व्यथा दूर करावी, अशी या चहा दुकानदारांची मागणी आहे.

ग्रामीण तसेच शहरी भागात पोटाची खळगी भरण्यासाठी शेकडो व्यक्तींनी कमी खर्चात उभारता येणारा व्यवसाय म्हणून चहापानाच्या टपऱ्या सुरू केल्या. परंतु, गेल्या दोन महिन्यांत चहा व पानटपरीचालकांच्या व्यवसायाला लॉकडाउनचा मोठा फटका बसला आहे. दीर्घ काळापासून व्यवसाय पूर्णपणे कुलूपबंद झाल्याने कुटुंबांचा उदरनिर्वाह कसा करावा, असा प्रश्‍न त्यांच्यासमोर आहे. लॉकडाउनमधून सवलत मिळताच ठराविक वेळेत हार्डवेअर, इलेक्‍ट्रॉनिक्‍स, स्टेशनरी, मोबाईल आणि इतर दुकाने व आता सलूनची दुकानेही सुरू झालीत. बससेवा सुरू झाली असून 1 जूनपासून रेल्वे सुद्धा सुरू होणार आहे. मात्र, हे निर्बंध चहा विक्रेत्यांवरच का? असा प्रश्‍न उपस्थित केला जात आहे.

रोजीरोटीचा प्रश्‍न झाला बिकट

आजवर होती नव्हती तितकी मिळत घरबसल्या खर्च झाली. पुढचे दिवस कसे काढावे हाच विचार त्यांच्यासमोर आहे. वरठी बसस्थानक, रेल्वे स्थानकाजवळील चहा व पानटपऱ्या अजूनही कुलूपबंद
आहेत. त्यामुळे रोज कमावून संसाराचा गाडा हाकणाऱ्या व्यावसायिकांसमोर आता जगायचे कसे, असा प्रश्‍न आहे. इतर व्यावसायिकांकडून सुरक्षित अंतराची व आवश्‍यक काळजी घेण्याची हमी घेऊन परवानगी देण्यात आली. मग याच अटी लागू करून आम्हालासुद्धा चहा, पान विकण्याची परवानगी द्यावी, अशी त्यांची मागणी आहे. सरकार एकीकडे महसूल कमाविण्यासाठी दारूच्या दुकानांना परवानगी देते. मात्र, ज्यांचे पोट या व्यवसायावर अवलंबून आहे, त्यांना चहा विकण्याची परवानगी देण्यास टाळाटाळ केली जात आहे.

अवश्य वाचा- बीपीएल कार्डधारक असलेल्या आंतरराष्ट्रीय खेळाडूंनाच मदत, मग इतरांनी उपाशी मरायचे का? क्रीडा खात्याच्या पत्रकावर तीव्र नाराजी

चहा विक्रीचा व्यवसाय हे माझ्या उत्पन्नाचे एकमात्र साधन आहे. दिवसभर विकलेल्या चहाच्या पैशातून 3 व्यक्तींच्या कुटुंबाचा उदरनिर्वाह चालतो. मीच घरातील कमावता व्यक्ती आहे. तीन महिन्यांपासून चहाचे दुकान बंद आहे. त्यामुळे माझी आर्थिक परिस्थिती बिघडली आहे.
-निखिल डोंगरे,
चहा विक्रेता वरठी.

गेल्या तीन महिन्यापासून माझे दुकान बंद आहे. यादरम्यान इतर काम शोधायचा प्रयत्न केला मात्र, अशा परिस्थितीमध्ये तेही मिळाले नाही. त्यामुळे, कुटुंबीयांचे पोट कसे भरावे हा प्रश्न आहे. या सर्व विचारांमुळे मानसिक दडपण येत आहे.
-मुकेश तिजारे, चहा विक्रेता वरठी