नागपूर : केंद्रीय प्रवेश समितीमार्फत राबविण्यात येत असलेल्या अकरावी प्रवेशासाठी सोमवारपासून (ता. 23) फेरपरीक्षेतील उत्तीर्ण आणि एटीकेटीच्या विद्यार्थ्यांच्या प्रवेशासाठी फेरीची सुरुवात करण्यात येणार आहे. आतापर्यंत अकरावीच्या निम्म्या म्हणजे 29 हजार 169 जागांवर प्रवेश दिले आहे. 29 हजार 151 जागा रिक्त आहेत.
शहरातील 58 हजार 240 जागांवर प्रवेशप्रक्रिया राबविण्यात आली. पहिल्या तीन फेरीत अकरावीच्या 22 हजार 501 जागा भरण्यात आल्या होत्या. मात्र, त्यानंतरही जवळपास 35 हजार 741 जागा रिक्त असल्याने नऊ ऑगस्टपासून विद्यार्थ्यांसाठी विशेष फेरीचे आयोजन केले होते. 14 ऑगस्टला विशेष फेरीची गुणवत्ता यादी प्रकाशित करून 16 ते 19 ऑगस्टपर्यंत कनिष्ठ महाविद्यालयात विद्यार्थ्यांनी प्रवेश निश्‍चित केले. यानंतर पुन्हा प्रथम येणाऱ्यास प्राधान्य देणाऱ्या सहा फेऱ्या घेण्यात आल्या. आतापर्यंतच्या सर्वच फेऱ्यांमध्ये 29 हजार 169 प्रवेश देण्यात आलेत. कला शाखेत दोन हजार 488, वाणिज्य शाखेत सात हजार 731, विज्ञान शाखेत 17 हजार 274 तर एमसीव्हीसीत एक हजार 676 जागांवर प्रवेश देण्यात आले.
सोमवारपासून अर्ज भरण्याच्या प्रक्रियेस सुरुवात होईल. 26 सप्टेंबरपर्यंत अर्ज नोंदणी करायची असून, याच दिवशी रिक्त जागांची माहिती देण्यात येईल. विद्यार्थ्यांना एक ऑक्‍टोबरपर्यंत प्रवेश घ्यायचे आहे. विद्यार्थ्यांसाठी शेवटली संधी असून, यानंतर अकरावीची प्रवेशप्रक्रिया थांबविण्यात येणार आहे.